Militares da Brilat destacan que "non houbo incendios en ningunha das zonas onde patrullaron"

As Forzas Armadas desenvolven desde este 15 de agosto e ata o próximo 30 de setembro unha "operación de apoio" denominada 'Centinela Gallego', consistente en establecer un despregamento de patrullas e medios aéreos de vixilancia para contribuír á prevención de incendios forestais. Segundo destacou a Brilat, "non houbo incendios en ningunha das zonas onde patrullou".

O responsable militar desta operación, o xefe da Brigada Galicia VII (Brilat), o xeneral Antonio Romero Losada, respondeu este mércores en rolda de prensa ás críticas pola contratación do exército por 500.000 euros só para "labores de vixilancia e disuasión". Así, afirmou que, a diferenza dunha persoa particular, eles fano "durante as 24 horas do día". "A cidadanía chega un momento que se deita e nós seguimos vixiando durante toda a noite", aclarou.

Segundo sinalou o xeneral Romero Losada, os militares achegan "un plus que non pode facer calquera cidadán" e destacou que "a eficacia a demostra a propia estatística" o que lle valeu para asegurar que "non houbo incendios en ningunha das zonas onde patrullou a Brilat". "Non somos todopoderosos", engadiu Romero Losada, aínda que conveu que "evidentemente a seguridade cento por cento de que non se vai a producir un incendio ninguén a pode garantir".

"SENSACIÓN DE AUTORIDADE"

Nesta presentación desenvolvida na Base da Brilat en Pontevedra tamén participou o conselleiro de Medio Rural, José González, que abundou na resposta do xeral Romero Losada para incidir en que "se uniformes e coches do exército non teñen máis transcendencia que particulares vixiando os nosos montes algo falla" dixo respecto da "sensación de autoridade moito máis intensa" que, ao seu xuízo, transmiten os militares.

Pola súa banda a subdelegada do Goberno na provincia, Maica Larriba, sostivo en que é "fundamental" a súa presenza "para incidir na prevención", algo que cobra especial peso "nun contexto en que dous terzos dos incendios do verán son intencionados", afirmou.

Neste sentido, José González quixo "lanzar unha advertencia clara aos incendiarios". "Imos a por eles", subliñou e citou o despregamento de drones --vehículo aéreo non tripulado--, cámaras de vixilancia ou o "teléfono anónimo de denuncia". "Entre todos buscamos detectar actividade incendiaria para poder levar a estes delincuentes ante a Fiscalía", rematou en conselleiro.

PATRULLAS

O despregamento inicial da 'Operación Centinela Gallego' consiste en 27 patrullas, formadas por militares pertencentes a distintas unidades da Brilat e ao Tercio Norte de Infantaría de Mariña da Armada (Ferrol). En función do nivel de esforzo, aumentaríase o número de patrullas ata un máximo de 50 no nivel alto e ata 75 no nivel moi alto, indicaron.

Ademais, mantense a vixilancia aérea cun sistema aéreo pilotado por control remoto (RAVEN) que cubrirá, en sucesivos despregamentos, toda a zona de actuación. En canto ao ámbito xeográfico onde intervirán, as patrullas realizarán o seu labor en 33 municipios distintos, repartidos en sete distritos forestais das provincias de Pontevedra, A Coruña e Ourense. Tamén hai dous helicópteros en previsión de ser empregados no momento que a Xunta de Galicia solicitase ao Ministerio de Defensa un aumento do nivel de esforzo.

PRESENTACIÓN DE INFORMACIÓN SOBRE A OPERACIÓN SENTINELA GALEGO DA BRILAT DE PONTEVEDRA.. XUNTA | Fonte: Europa Press