O alcalde de Ponteceso critica a Sanidade por non ser máis áxil no caso do brote de gastroenterite

O alcalde de Ponteceso (A Coruña), Lois García Carballido, considera que "está en remisión" o brote de gastroenterite que afectou a unha trintena de persoas deste municipio e doutro veciño como Cabana.

"Os casos están a remitir", afirmou o rexedor, quen afirmou que "a incidencia está a baixar" e a situación atópase "máis normalizada" no municipio de Ponteceso.  Tras lembrar que o resultado das analíticas recibido na tarde deste martes indica que a "calidade da auga é boa", explicou que son as autoridades sanitarias --Consellería de Sanidade-- as que teñen que "comunicar algo" sobre se se mantén ou non a recomendación de beber auga da traída.

O rexedor lembrou que entre o luns e este martes, por parte do Concello de Ponteceso, coa axuda dun supermercado local, "repartiuse un trailer cheo de garrafas de cinco litros de auga, porta por porta aos veciños".

"Ás 12,00 horas do luns comunicaron (autoridades sanitarias) que era mellor que a poboación non bebese auga" da billa, lembrou o alcalde. O resultado das analíticas recibido este martes "ás 19,00 horas" constatou que "a auga ten parámetros de boa calidade", pero ata o venres non se coñecerán os datos relativos ao "norovirus".

Con todo, insistiu en que "a incidencia está a remitir". "Estamos expectantes dos resultados", abundou, para engadir que queren saber "que paso" para producirse o brote.

INFORMACIÓN

Para o alcalde de Ponteceso "debería haber máis axilidade e máis información" por parte das autoridades sanitarias. "Botamos de menos a presenza de persoas da Consellería en Corme e que dese máis información", admitiu.

"A Consellería de Sanidade está advertida desde o domingo polo sistema de alertas sanitarias", lembrou o rexedor, que manifestou que "farán" o que lles digan as autoridades en relación ao consumo de auga da traída. "Espero que comunique algo Sanidade sobre a recomendación", apostilou.

MÉDICO DE REFORZO

Sobre a atención sanitaria, o alcalde explicou que o luns "había xente afectada na sala de espera" do Punto de Atención Continuada (PAC) "e o médico estaba en Laxe nunha emerxencia". Por iso, reiterou a reivindicación de "un segundo médico, de reforzo" para a PAC de Ponteceso que, lembrou, "pediuse hai tempo".

Fronte a iso, fontes da xerencia sanitaria da Coruña aseguraron a Europa Press que a atención sanitaria na zona "está sempre cuberta" xa que, ante a ausencia do médico, avísase ao 061 para que está advertido "ante algunha urxencia" para "cubrir unha situación excepcional".

ANALÍTICAS

O Concello de Ponteceso mantense á espera de recibir unha nova análise sobre a presenza de norovirus na auga tras o primeiro informe da empresa subministradora, que indica que os parámetros analizados son normais.