Matarile Teatro aborda este sábado "a utopía da fuxida" con 'Os limóns, a neve e todo o demais'
Ana Vallés e Mónica García protagonizan unha peza que basea a súa proposta na potencia da imaxe e o corpo
- A galega Ana Vallés, candidata a Mellor Dirección de Escena nos Premios Max das Artes Escénicas
- Música, danza e teatro, as propostas para celebrar os 30 anos de historia do Auditorio de Galicia
Por E.P. | SANTIAGO DE COMPOSTELA | 17/10/2019 | Actualizada ás 12:53
A fuxida, a tentación de marcharse e deixalo todo tras unha porta que se pecha. Son os eixos sobre os que pivota 'Os limóns, a neve e todo o demais', peza coa que a veterana compañía Matarile Teatro participará na programación conmemorativa dos 30 anos do Auditorio de Galicia.
A representación será este sábado, ás 20,30 horas, da man de Ana Vallés e Mónica García, que comparten dirección e conforman ese dúo protagonista protagonismo nesta "utopía da fuxida" na que a potencia do corpo, da xestualidade e da imaxe serán a linguaxe coa que ambas explorarán o desexo de avanzar cara a esa fantasía.
A concelleira compostelá de Acción Cultural, Mercedes Rosón, e a propia Vallés presentaron a obra en rolda de prensa como antesala á posta en escena deste fin de semana, que virá precedida o venres dun coloquio na cafetaría Lasso cos directores artísticos de Matarile sobre os 33 anos de traxectoria do conxunto e da propia peza teatral.
A actriz e directora explicou que o teatro que se verá este sábado estará máis centrado "na creación plástica e fisicalidade", aproveitando a "potencia das imaxes e dos corpos" para crear a linguaxe que dá sentido e coherencia á obra, unha peza que "trata, pero non fala, da viaxe, o desexo" por deixar todo atrás.
Ese carácter "evocador" para crear emocións e situacións, engadiu, permitirá crear unha posta en escena "directa e física", que estará compartida cos propios espectadores no espazo escénico a través dunhas bancadas especiais instaladas para a ocasión e lograse así esa "intimidade" para achegarse ao público.
TRAXECTORIA INTERNACIONAL
A obra foi estreada no pasado Festival de Verán de Oviedo, en xullo de 2018, e contará ademais cunha xira nacional que os levará a Valladolid, Cádiz, Valencia ou Salamanca. A finais de mes, o 31 de outubro, pasará ademais pola Coruña cunha representación no Teatro Rosalía de Castro, e chegará a Madrid en novembro.
Mercedes Rosón destacou o "luxo" de poder contar cunha compañía cunha traxectoria" importantísima" e que comparte un vínculo coa propia cidade de Santiago, onde están situados desde o 86, para conmemorar ademais o 30 aniversario do Auditorio.
"É un patrimonio grande da nosa cultura", insistiu, con preto de 33 anos dedicados a un teatro innovador, ao uso diferencial da linguaxe e dunha destacada traxectoria "nacional e internacional".
