Os concellos da Veiga, Cervo e Parada de Sil, premiados polos seus proxectos de dinamización demográfica

Os concellos ourensáns da Veiga e Parada de Sil e o lucense de Cervo foron elixidos como gañadores dos primeiros Premios á Dinamización Demográfica, convocados pola Xunta de Galicia para recoñecer os mellores proxectos e medidas de impulso e revitalización demográfica en municipios de pequeno tamaño afectados polo declive.

A directora xeral de Administración Local, Marta Fernández-Tapias, anunciou este luns os tres municipios gañadores da primeira edición destes galardóns, aos que se presentaron iniciativas de 16 concellos galegos.  De entre os proxectos presentados a este premio, dotado cun orzamento global de 77.500 euros, a Administración galega elixiu os tres mellores en base a criterios obxectivos e á avaliación de dous expertos en demografía.

En concreto, o primeiro premio, dotado con 40.000 euros, foi para o municipio da Veiga, en recoñecemento a un proxecto global de impulso demográfico que abarca aspectos "moi transversais", recoñeceu a directora xeral. 

Entre outras cousas, este municipio aposta por reforzar a economía local, cun proxecto para pór en marcha un viveiro empresarial a disposición dos veciños interesados en emprender no sector agrario. Do mesmo xeito, céntrase no ámbito económico pondo en valor produtos da zona, como o mel ou as fabas, e fomentando a plantación de bosques autóctonos.

Do mesmo xeito, a rehabilitación de vivendas baleiras en desuso e de antigas casas-escola para aluguer permitiu o traslado de varias familias ao municipio e habilitáronse axudas á natalidade e ao transporte, así como programas de conciliación.  No ámbito do turismo, o concello creou en 2017 o Centro de Visitantes ZEC Pena Trevinca e conta desde 2015 coa certificación como destino turístico Starlight.

REHABILITACIÓN DE VIVENDAS E CONCILIACIÓN

O segundo galardón nesta edición, dotado con 25.000 euros, é para Parada de Sil, que presentou un "proxecto moi específico" para o asentamento de novas familias e mozas a través da rehabilitación dun grupo de casas en ruínas no núcleo de Fondevila para emprazar cinco vivendas unifamiliares.

Ademais, para fomentar a conciliación, o concello propón a reforma dunha antiga construción para albergar un espazo de coidado e casa de lecer para nenos menores de 10 anos en períodos vacacionais e para nenos en idade previa á escolarización durante o curso.

Finalmente, o Concello de Cervo recibiu o terceiro premio, dotado con 12.500 euros, por un proxecto de dinamización demográfica que inclúe medidas para o asentamento de familias como a rehabilitación de inmobles, a creación de espazos para novos emprendedores, a organización de encontros de dinamización empresarial, axudas á escolarización ou bolsas de formación para titulados universitarios ou de FP, actividades de voluntariado cultural ou ferramentas de conciliación.

Con estes premios, a Xunta busca visibilizar e recoñecer as boas prácticas das entidades locais de menos de 20.000 habitantes en materia de atracción de poboación e asentamento.
A directora xeral de Administración Local puxo en valor o nivel de resposta municipal tratándose da primeira edición deste premio, aínda que confiou en que a do próximo ano, cuxa dotación ascenderá ata os 100.000 euros, teña aínda mellor acollida.