Mareas da Coruña, Ferrol, Santiago e Vigo coordínanse para trasladar as demandas dos veciños con "voz unánime"

Representantes das mareas da Coruña, Ferrol, Santiago e Vigo celebraron un encontro este martes co que buscan coordinarse, manter a coherencia política e elevar as súas reivindicacións, e as demandas dos veciños, a instancias máis elevadas, pero a través dunha "voz unánime".

O portavoz de Ferrol en Común, Jorge Suárez, e Xiana Penedo reuníronse no Concello con representes das outras mareas municipais, concretamente con María García e Iago Martínez, de Marea Atlántica; Martiño Noriega e Marta Lois, de Compostela Aberta; Rubén Pérez e Oriana Méndez, por Marea de Vigo.

"O noso obxectivo é manter a coherencia política que sempre tivemos, a reivindicación dunha autonomía local suficiente cun único obxectivo, como é mellorar a calidade de vida da xente, pór ás persoas no centro das políticas e ante un escenario dun Goberno no Estado de progreso, pois agora quédanos manter as reivindicacións que sempre tivemos, talvez agora con máis contundencia, para conseguir mellorar o contexto diario na vida das persoas", sinalou.

Suárez apuntou que estas catro formacións "fixeron un traballo intenso" e considerou que "teñen valor, vixencia" e teñen que traballar para estas demandas e necesidades dos municipios "sexan efectivas, reais e se convertan en leis e realidades".

Pola súa banda, María García, de Marea Atlántica, asegurou que aspiran a darlle "continuidade" a estes encontros de coordinación para "elevar unha voz unánime na transmisión das demandas das cidades ao resto das administracións, tanto da Xunta como de Goberno central".

"POR ENRIBA DE DINÁMICAS ELECTORAIS"

Martiño Noriega, destacou que arrinca "un camiño de colaboración institucional desde o ámbito local" que se situará "mesmo por enriba de dinámicas electorais", e que "esta é a vontade coa que nace este espazo de cooperación" e "aberto a outras experiencias municipalistas, co obxectivo de reunirse e traballar xuntos no mandato que acaba de comezar".

"Estamos obrigados de escapar de posicións de soidade, a intercambiar experiencias, abrir debates e a cooperar, xa que mesmo en tres das cidades que aquí estamos presentes somos chave da gobernabilidade", lembrou.

Por último, Rubén Pérez, de Marea de Vigo, destacou "as políticas que se realizaron nestes municipios", ademais de reclamar "a derrogación da Lei de Estabilidade Orzamentaria, a coñecida popularmente como lei Montoro, que leva anos secuestrando a posibilidade de ter persoais adecuados nos concellos", ademais de impedir crear infraestruturas que teñan "unha sustentabilidade social e democrática evidente".

A pesar diso, de momento sitúan esta colaboración desde o municipalismo, e non con vistas ás autonómicas. "Nós nunca deixamos de colaborar no que se deu en chamar unidade popular, pero este espazo que estamos a presentar non vai máis aló do municipalismo, pero isto nace como un proxecto de cooperación entre as diferentes mareas municipais para esixir e demandar para os nosos veciños aquelas políticas doutras administracións, e que leven a efecto".