O funicular de transporte de materiais do 1927 en Valga será Ben de Interese Cultural

O Diario Oficial de Galicia publica este xoves o inicio do procedemento para declarar Ben de Interese Cultural (BIC) o funicular de transporte aéreo de materiais Novo y Sierra de Valga, construído en 1927 e "único" na industria da cerámica.

Segundo informa o Goberno galego nun comunicado, esta liña está situada na parroquia de Campaña e conectaba a mina Mercedes, a antiga fábrica de cerámica Novo y Sierra e o porto no río Ulla.

O BIC estará formado por oito elementos principais: as sete torres --catro delas completas-- e unha zona de embarcadoiro. Este recoñecemento implica a máxima protección e tutela do funicular e permitirá a visita pública gratuíta mínimo catro días ao mes durante catro horas ao día.

A Xunta sinalou que estas torres permitían unha circulación de ida e volta, que combinaba a suspensión e o percorrido por carrís con vagóns que podían transportar máis de 300 quilogramos. Ademais, contaban cun sistema modular, que permitía cambiar a altura e anchura das torres. As conservadas aínda varían no alto entre cinco e sete metros.

A zona do embarcadoiro mantén o sistema de soporte do material cerámico, cun alicerce central que sostería a última das rodas do sistema de xiro. Actualmente non conta coa estrutura metálica que albergaría as rodas para o xiro de vagóns de carga.

O Goberno autonómico explicou que estes ámbitos están agora en proceso de reintegración ambiental e consisten en "espazos de valor" natural e paisaxístico. Ademais, entre a zona máis próxima ao Ulla e aquelas de extracción transcorre a liña ferroviaria, da cal aínda hai instalacións en funcionamento.

O funicular de Novo y Sierra ten a súa orixe en 1927 e a súa estrutura metálica, aínda conservada, converte o conxunto nun "exemplo único" na comunidade, pois os seus sistemas de suspensión consistían nunha "tecnoloxía avanzada" para a época.

Torres do funicular aéreo en Valga | Fonte: Manuel Lara - asociacionbruxa.com