As seis fábricas de pellets de Galicia produciron o pasado ano o 12% do total estatal
A causa da COVID-19 retardouse o traballo das empresas instaladoras de novas caldeiras e estufas de pellets, polo que se espera que o aumento do consumo en España durante 2020 sexa só do 2 por cento.
Por E.P. | SANTIAGO DE COMPOSTELA | 04/05/2020 | Actualizada ás 13:09
A produción das seis fábricas de pellets de Galicia alcanzou as 86.284 toneladas o pasado ano 2019, o que representa o 12 por cento do total producido en España, 714.000 toneladas, unha cifra que supón un crecemento dun 20 por cento.
Hai dez anos existían en España 29 fábricas de pellets cunha produción de 150.000 toneladas destinadas, principalmente, ao mercado exterior. Unha década despois, en 2019, producíronse en España 714.000 toneladas en 82 fábricas --seis delas en Galicia--, que se destinan principalmente ao mercado interior, segundo os datos facilitados pola Asociación Española de Valoración Enerxética (Avebiom) a Europa Press.
Da produción española, o 77 por cento de pellets destínase a uso doméstico, con sacos de 15 quilogramos como forma máis común de consumo no mercado interno.
Outra característica do mercado español é que o selo ENplus, o certificado de calidade internacional máis recoñecido, é o máis demandado polos clientes españois. Está certificado baixo este selo o 82 por cento do pellet que se fabricou en 2019.
Por comunidades autónomas destaca a produción de Castela e León, con máis 223.000 toneladas, Cataluña con 97.000 toneladas e en terceiro lugar Galicia, cunha produción de 86.000 toneladas en 2019.
Este é un produto que se fabrica en 16 das 17 comunidades autónomas e que contribuíu a xerar novos empregos estables no medio rural. Ademais de ser ano marca en termos de produción, 2019 tamén o foi en volume importado desde Portugal. Un exceso de produción en Portugal, provocado por unha menor demanda do mercado británico, facilitou a entrada en España de 160.000 toneladas de pellet.
Este aumento da importación, xunto co suave outono en España, encheron os almacéns dos fabricantes e distribuidores españois, que axustaron o ritmo de fabricación para adaptarse á demanda actual.
Doutra banda, a causa da COVID-19 retardouse o traballo das empresas instaladoras de novas caldeiras e estufas de pellets, polo que se espera que o aumento do consumo en España durante 2020 sexa só do 2 por cento, mentres que o crecemento medio do consumo de pellet en España o últimos tres anos foi do 12 por cento.
As expectativas para a produción de pellet de madeira en España no ano 2022 son máis positivas e espérase que a cifra se achegará ás 900.000 toneladas.
