O turismo que vén: "Por saúde mental, a xente quere saír si ou si"

Veranear en Galicia parece unha posibilidade menos afastada conforme van pasando as semanas. Os datos así o testemuñan: os hoteis, pensións, hostais, casas rurais e apartamentos turísticos galegos rexistran xa reservas de cara, sobre todo, ao mes de agosto, ademais de xullo e setembro, unha opción "optimista" pola que se decanta un turismo de corte nacional e familiar que mantén estes plans por "saúde psicolóxica".

"Por saúde mental, a xente quere saír si ou si, nótase", son as palabras da presidenta da Asociación de Vivendas Turísticas de Galicia (Aviturga), Dulcinea Aguín, que estes días reciben, ademais de reservas, "moitas consultas", e que se atreve a mostrarse "optimista" cos resultados deste verán marcado pola crise da COVID-19.

"Sabemos que non vai ser unha tempada como as anteriores pero, se nos serve para salvar un pouquiño a tempada e cubrir gastos, teriámosnos que dar por satisfeitos", di Aguín, representante dunha parte do sector turístico que, tras a perda da Semana Santa polo confinamento, enfoca o verán como a posibilidade de recuperar a actividade.

RESERVAS DESDE INICIO DE ANO

Segundo contou a representante de Aviturga a Europa Press, os pisos turísticos galegos tiñan xa efectuadas desde inicios de ano reservas para a tempada de verán que, na maior parte, non se cancelaron, á espera de como evolucionarán as próximas semanas. Ademais, recibíronse xa novas reservas en puntos turísticos da comunidade para os meses de xullo e, sobre todo, agosto e setembro, e "moitas peticións de información e consultas" á espera de que se "materialicen" as instrucións das autoridades para a mobilidade.

"Moita xente quere vir, pero está a expensas de como é o desconfinamento nos traballos, a mobilidade, se se manteñen as súas vacacións...", exemplifica Aguín que, no entanto, subliña que "as estatísticas e a situación van mellorando". "Eu son optimista", resume.

O viaxeiro que copa as reservas de verán este ano en Galicia, por cuestións evidentes, é nacional, sobre todo galego e de comunidades limítrofes, así como de Madrid. Ademais, a presidenta de Aviturga detecta un cambio no tipo de viaxes. "O ano pasado había reservas de catro ou cinco días, este ano detectamos reservas de 15 días. A xente prefire estar máis tempo fixa nun só sitio e non ir cambiando", apunta.

TURISMO RURAL E ZONAS DE PRAIA, EN ALZA

Tamén desde o Clúster Turismo de Galicia recoñecen que se constatou unha reactivación nas reservas das zonas turísticas de cara aos meses de xullo e, sobre todo, agosto, un panorama no que se ven favorecidas as casas rurais e as áreas de sol e praia.

Así, segundo indicaron a Europa Press, as reservas para o verán detéctanse sobre todo en zonas como a Ribeira Sacra, as zonas de praia de Pontevedra, como Sanxenxo, ou Santiago de Compostela, onde "moitos establecementos hoteleiros teñen aberta a posibilidade de reserva para esas datas". Ademais, destacan, para dar tranquilidade ao cliente nunha situación cambiante, "moitos deles inclúen opcións de cancelacións sen pago por adiantado e sen recarga de ningún tipo".

No caso do sector hoteleiro, destacan que, "na súa maioría", trátase de turismo galego, así como doutros puntos do territorio nacional, especialmente no caso de Sanxenxo, onde se "fidelizou" un "gran número de visitantes" doutras partes da península, sobre todo de Madrid.

A situación permite ser optimistas especialmente no caso do turismo rural, cuxos establecementos "consideran que poderán remontar a tempada" ao reunir condicións "adecuadas" para unha estancia cumprindo as condicións da nova normalidade e a prevención do coronavirus.  "Aínda é pronto para saber se os viaxeiros van responder, pero as sensacións son máis positivas que as que existían hai unhas semanas", explican desde o Clúster e as asociacións de hostalaría.

MOBILIDADE ENTRE PROVINCIAS

Aínda coa vista posta no verán, os hoteis galegos recoñecen que se necesita a mobilidade entre provincias e a posibilidade de operar con seguridade sanitaria para que o sector poida reabrir as súas portas, algo que o decreto de desescalada permitiría desde a fase 1.

"É moi complicado que se poidan reabrir hoteis así", explican desde o Clúster, unha entidade que reclama para que estes establecementos poidan operar, polo menos, a mobilidade dentro da comunidade autónoma, así como que se clarifiquen cuestións como a aplicación dos ERTE "para poder recuperar o persoal de forma graduada" mentres non se recupera a facturación.

"As aperturas nestas condicións, ata que poidamos avanzar nas fases de desescalada, cremos que será moi escasas, se non practicamente nulas, ou limitadas a aqueles establecementos que mantiveron un certo funcionamento ao estar na lista de aloxamentos de garda", destacan.

Praia de Caveiro, en Porto do Son (A Coruña). | Fonte: Europa Press