Rescatan tres tripulantes dun barco de recreo varado na enseada de Illa Pancha, en Ribadeo

Tres tripulantes dun barco de recreo varado na enseada de Illa Pancha, en Ribadeo (Lugo), foron rescatados na tarde deste xoves. Segundo informou o 112, o rescate produciuse grazas a outro barco particular que se atopaba próximo ao grupo en apertos no momento dos feitos.

Posto que os tripulantes da embarcación encallada xa levaban un par de horas dentro da auga, desde o 112 Galicia solicitouse a intervención dos servizos sanitarios de urxencia para que os puidesen atender ao chegar ao peirao de Ribadeo.

Foi sobre as 18,30 horas cando un particular alertou ao 112 dunha embarcación varada no mar. De acordo co seu relato, había persoas dentro da auga que necesitaban axuda para volver ao areal en seguridade.

Con estes datos, o Centro Integrado de Atención ás Emerxencias (CIAE) 112 Galicia informou a Salvamento Marítimo, a Gardacostas de Galicia, así como aos axentes da Garda Civil e da Policía Local, e tamén aos membros de Protección Civil de Ribadeo.

Finalmente, as tres persoas foron conducidas ao porto a bordo da embarcación particular e, unha vez en terra, puideron ser atendidos polo equipo médico de urxencias.