Activos tres novos incendios en Lobios, Navia de Suarna e Lousame

Tres novos incendios foron rexistrados nas últimas horas nos municipios de Lobios (Ourense), Navia de Suarna (Lugo) e Lousame (A Coruña), uns lumes que se suman aos que xa afectan a distintas localidades de Ourense, como o de Toén, cuxa superficie afectada supera xa as 200 hectéreas.

Segundo os últimos datos da Consellería de Medio Rural, o de Lousame --parroquia de Tállara-- foi rexistrado ás 5,07 horas da madrugada con dous focos, o que, segundo fontes do departamento autonómico, apunta a "intencionalidade".

A superficie afectada por este incendio xa supera as 20 hectáreas e, na súa extinción, participan un hidroavión, un helicóptero, cinco axentes, 11 brigadas, nove motobombas e dúas pas.

Así mesmo, ás 8,00 horas da mañá deste sábado foi detectado outro lume no municipio de Lobios, parroquia de Manín, que afecta a zonas de Galicia e de Portugal.

Neste caso a Consellería de Medio Rural aínda non ten estimación da área queimada, que afecta o Parque Natural Baixa Limia-Serra do Xurés, e xa mobilizou medios para que se despracen ao momento.

Pola súa banda, desde as 22,07 horas do venres permanece activo outro incendio forestal no municipio lucense de Navia de Suarna, parroquia de Son, que, segundo as últimas estimacións elévase a unhas 70 hectáreas. Para o seu control mobilizáronse un técnico, catro axentes, 16 brigadas, 10 motobombas e unha pa.

SEGUE ACTIVO O DE TOÉN

A Consellería do Medio Rural informou tamén de que continúa activo o incendio rexistrado ás 17,40 horas do venres en Toén (Ourense), parroquia de Moreiras. As últimas medicións cifran a superficie afectada por este lume ascende xa ás 200 hectáreas.

Na súa extinción mobilizouse un técnico, sete axentes, 20 brigadas, 14 motobombas, dúas pas, 10 avións e nove helicópteros, así como efectivos da Unidade Militar de Emerxencias (UME).

ESTABILIZADO O DE MUÍÑOS

Tamén permanece estabilizado o rexistrado ás 00,43 horas no municipio ourensán de Muíños, parroquia de Requiás, que se produciu no mesmo lugar onde foron extinguidos outros dous incendios na madrugada anterior.

Afecta a unhas 50 hectáreas provisionais do Parque Natural Baixa Limia - Serra do Xurés. Para a súa extinción mobilizáronse dous axentes, 11 brigadas, sete motobombas, unha pa, nove avións e sete helicópteros.

LOBEIRA

Ademais, está controlado desde as 23.14 horas da pasada noite o incendio do concello ourensán de Lobeira, parroquia de Fraga, que tamén afecta o Parque Natural Baixa Limia - Serra do Xurés. A superficie afectada rolda as 30 hectáreas.

Por último, continúa controlado desde as 19,27 horas do venres o declarado na parroquia de Pradorramisquedo, en Viana do Bolo (Ourense). Este lume empezou o pasado luns e, segundo as últimas estimacións, afecta a unhas 200 hectáreas.