A CIG acusa ao TSXG de "nesgo político" por avalar os servizos mínimos da Xunta na folga de educación

O TSXG desestimou a suspensión cautelar que pedía a CIG duns servizos mínimos considerados abusivos para anular os efectos da folga do persoal nos centros educativos.

Nun comunicado, o sindicato acusa ao alto tribunal galego de emitir un auto "inzado de valoracións e opinións de carácter político, mais propias dun gabinete de comunicación da Xunta ou do Partido Popular que dun alto tribunal".  "Chega a atreverse a ironizar sobre as intención do comité de folga ao dicir que -No quiere pensar este Tribunal que las centrales sindicales que se agrupan en el Comité de Folga recurrente carecen de la especial sensibilidad de la que, con buen criterio y especialmente en estos últimos días, hace gala la inmensa mayoría de la sociedad española-", recolle.

A CIG critica que o TSXG non tivo en conta a vulneración do dereito fundamental á folga, "claramente executado cuns servizos mínimos do 100% para case todo o persoal non docente", nin a obriga de ter, por primeira vez, a obriga de abrir todas as aulas cun docente á fronte ou o "abuso que supón que a Consellaría xogase cos prazos para publicar no DOG os servizos máximos xusto na véspera da primeira xornada de folga, sendo negociados con menos de corenta e oito horas de antelación".

O sindicato tamén critica que o TSXG apoie á Xunta por “…la necesidad de recuperar, en la medida de lo posible, la vida cotidiana y permitir a los progenitores de aquellos [o alumnado] conciliar su vida laboral y familiar, contribuyendo, de ese modo todos, a regenerar la dañada economía nacional que, con medidas de huelga como la prevista, sin los servicios mínimos establecidos, solo podrá resultar mas perjudicada”.

Por iso, a central sindical amosa o seu "total rexeitamento a un auto claramente político e que pon contra as cordas a liberdade do profesorado e do resto do persoal dos centros educativos", xa que non ten en conta o seu dereito á seguridade e á saúde.