Onde están os contratos con Marcial Dorado?
Feijóo insiste en que non destruíu contratos e di que todo o que había "xa se lle remitíu aos grupos". Toda a oposición cualificao de "mentireiro" e pídelle que dimita.
Por Galicia Confidencial | Compostela | 29/05/2013 | Actualizada ás 12:18
"O meu goberno non destruíu ningún papel, ningún documento nin ningún contrato vinculado coas empresas de Marcial Dorado". Con contundencia volveu respostar Feijóoo ás preguntas dos grupos da oposición sobre os famosos contratos que a Xunta asinou co narcotraficante e que, sen embargo, non aparecen por ningún lado.
Nunha nova tensa sesión parlamentaria Feijóo insistiu no que xa dixo noutras intervencións na Cámara sobre a súa relación sobre Dorado. "Reafirmome sen emendas nin raspaduras no que xa dixen", suliñou ao inscribir esa amistade nos seus tempos de xuventude nos que non sabía a que se adicaba o que entón era un recoñecido contrabandista da Arousa.
"Mentireiro"
Pero a repetición de argumentos do presidente non convencen á oposición que insistiu, novamente, en que explique as lagoas que existen nesa relación que mantivo con Marcial Dorado, especialmente, nos contratos que as súas empresas tiveron coa Xunta. Tanto o portavoz do BNG na Cámara, Francisco Jorquera, como a viceportavoz de AGE, Yolanda Díaz, cualificaron a Feijóo de "mentireiro" e esixiron a súa "dimisión" polo "ben" de Galicia.
E é que todos os grupos da oposición insistiron este mércores na "contradición" que supón o feito de que Feijóo diga que non hai contratos anteriores a 2003 e que, despois, o secretario xeral de Sanidade, Antonio Fernández-Campa, "afirmase que era imposible reunilos".
Curiosamente, o presidente avalou o manifestado por Fernández-Campa e aludiu á existencia dunha comisión de selección documental, "órgano que decide sobre os documentos que se gardan na Administración", incidiu ao tempo que manifestou que non se destruíu "ningún contrato".
A quen crer?
"Se non me cre a min, creáo a el. Non se podo ensinar o que non existe", insistiu Feijóo. "Tanto el coma vostede están mentindo. Iso é unha falsedade. E os que din mentiras deben dimitir", espetoulle o líder do PSdeG, Pachi Vázquez, a quen Feijóo tentou ignorar e mesmo chamou "teloneiro" de AGE e BNG.
"Non habendo documentos que o sosteñan, a Xunta proporcionou xa toda a información", dixo Feijóo en alusión á relación dos pagos a firmas de Dorado nos últimos 20 anos remitida á Cámara. "A relación comercial, iso é o importante", esgrimiu, para engadir que mesmo se proporcionaron "máis" datos dos que pediu a oposición ao incluír subvencións.
