Dúas pezas escultóricas do artista Manolo Paz incorpóranse ao miradoiro do Gaiás
O esculturo apostou por dotar dun dobre arco á instalación, un elemento característico do románico co que constrúe a "apertura ocular interior desde a que se encadra o visionado da Catedral".
Por E.P. | SANTIAGO DE COMPOSTELA | 13/12/2020 | Actualizada ás 17:49
Dúas pezas escultóricas elaboradas en pedra polo artista Manolo Paz decoran desde este fin de semana ao miradoiro do monte Gaiás desde onde pode contemplarse unha ampla panorámica de Santiago de Compostela.
As obras, bautizadas 'Espellos', están no Bosque de Galicia, no complexo da Cidade da Cultura, e foron visitadas polo conselleiro de Cultura, Román Rodríguez, en compañía do creador da intervención.
Trátase de dúas pezas de 3,5 metros de alto por 2,8 de alto e 12 toneladas de peso que, segundo explica a Xunta nun comunicado, pretende "estreitar aínda máis a conexión da Cidade da Cultura co Camiño de Santiago, xa que a Vía da Prata transcorre paralela ao monte Gaiás" na súa entrada á cidade polo barrio de Sar.
A pedra elixida para erixir as esculturas está sacada da canteira compostelá de Lamas de Abade e evoca aos muros interiores das rutas a Santiago.
Ademais, o artista apostou por dotar dun dobre arco á instalación, un elemento característico do románico co que constrúe a "apertura ocular interior desde a que se encadra o visionado da Catedral", sinala a Administración galega.
O artista Manolo Paz di concibir a instalación baseándose na "imaxe" que o camiñante ten na súa mente da Catedral como meta do camiño e que estas esculturas achegan unha oportunidade para "reflectir uns banzos" antes da chegada.
"Nesta ocasión, apostamos por crear sinerxías entre natureza e cultura coa colaboración de Manolo Paz, un dos artistas máis imaxinativos da escultura galega", resaltou Román Rodríguez, que destacou a "perpectiva orixinal" que a instalación de Paz ofrece da basílica compostelá e da propia capital galega.
