Aumentan os casos activos en residencias con 235 novos contaxios en centros da Pastoriza, Xove e Tui
Entre os traballadores dos xeriátricos, o cómputo de positivos ascendeu de maneira importante, ata os 121, despois de detectarse 26 positivos e tres altas.
- Galicia, con 800 novos positivos, supera a súa marca ademais de subir os contaxios en todas as áreas agás Ferrol
- Morren outras cinco persoas por covid, dúas delas en residencias
Por Europa Press / Redacción | Santiago de Compostela | 09/01/2021 | Actualizada ás 13:34
Os usuarios de residencias de maiores de Galicia diagnosticados de covid-19 continúan a súa tendencia ascendente e sitúanse en 235, tras notificarse 28 novos positivos, segundo consta no parte diario que elaboran as consellerías de Sanidade e de Política Social.
Dos contaxios detectados nas últimas horas, 18 están vinculados ao brote do xeriátrico da Pastoriza , que duplica os seus casos activos e pasa a ter 36; seis ao do centro Paz e Ben de Tui, que ascende a 39 anciáns contaxiados; e outros dous ao foco da Residencia San Bartolomeu de Xove, que conta con 25 infectados.
Con todo, do cómputo global tamén hai que retirar dous falecementos ocorridos nas últimas horas na residencia de Xove e na Santa Teresa Jornet da Coruña, ademais doutros cinco usuarios que recibiron o alta: dous no centro de Xove, outros dous no Asilo San Sebastián e San Lázaro de Ribadeo e un na residencia Monte Tecla da Guarda.
Tras estas variacións, a residencia DomusVi de Vimianzo continúa como a que ten máis casos activos de covid-19 entre os usuarios, cun total de 72. Seguen a esta, aínda que de lonxe, a xeriátrico Paz e Ben de Tui, con 39 anciáns infectados, e o da Pastoriza, con 36. A San Bartolomeu de Xove conta con 25 maiores afectados, a residencia de Ribeira continúa con 19 e o Hospital Asilo de Ribadeo descendeu ata os 18 que figuran na actualización deste sábado.
Por baixo da decena están o centro Santa Teresa Jornet da Coruña, con seis positivos; A Saleta de San Cristovo de Cea, con catro; o CRAPD Vigo II, con outro catro; e a residencia de Burela, a Vila do Conde de Gondomar e os Apartamentos Tutelados San Bartolomeu de Xove, cun caso cada un.
TRABALLADORES CONTAXIADOS
En canto aos traballadores dos xeriátricos, o cómputo de positivos ascendeu de maneira importante, ata os 121, despois de detectarse 26 positivos e tres altas. En concreto, os novos contagios rexistráronse no centro Paz e Ben de Tui (9), na Pastoriza (8), en DomusVi Vimianzo (4), en DomusVi Barreiro de Vigo (1), na nosa Señora da Esperanza de Ourense (1), na residencia de Ribeira (1), en San José de Arzúa (1) e na Ballesol de Oleiros (1). As altas correspóndense con dous empregados da Saleta de San Cristovo de Cea e un en Monte Tecla da Guarda.
Por centros, o persoal máis afectado nos datos deste sábado é a DomusVi Vimianzo, cun total de 24 traballadores infectados, seguida da Bartolomeu de Xove, con 12, e os xeriátricos da Pastoriza e de Tui, con 10 cada un. O resto de centros que aparece na listaxe está por baixo da decena.
Pola súa banda, os centros de atención á discapacidade (CAPD) mantéñense sen usuarios afectados, pero si que hai catro traballadores contaxiados --mesma cifra que un día atrás--. Así, hai dous positivos no persoal do CAPD da Coruña, un na residencia de adultos Pai Menni de Betanzos e outro no Fogar San Rafael de Vigo.
