A Xunta vacina á conselleira delegada de DomusVi e a empresa alega o "contacto constante" con residentes
Non estaba entre as persoas "preferentes" di a Consellería de Política Social. O BNG esixe "explicacións inmediatas" á Xunta pola vacinación da conselleira delegada e o seu irmán, feito que o PSdeG tacha de "escandaloso".
Por Europa Press / Redacción | SANTIAGO DE COMPOSTELA | 03/02/2021 | Actualizada ás 18:56
A Xunta de Galicia vacinou contra o coronavirus á conselleira delegada das residencias DomusVi, Josefina Fernández, e ao seu irmán, Pedro Fernández, que é director da zona Galicia sur da multinacional, segundo confirman fontes da Consellería de Política Social e da empresa consultadas por mor da información que publica este mércores 'eldiario.es'.
En concreto, a vacinación produciuse durante o mes de xaneiro e na residencia DomusVi Vigo, segundo Política Social, xa que ese centro incluíu na lista dos seus traballadores para recibir a vacina á súa conselleira delegada, "que non figuraba inicialmente na relación de persoal que manexaba a Xunta". O mesmo sucedeu co seu irmán, segundo recoñecen as fontes consultadas da consellería.
A Xunta alega que entende que DomusVi "interpreta que ambos forman parte do equipo desta residencia e que debería ser vacinada". De todos os xeitos, remite a "as explicacións pertinentes" da compañía.
DomusVi, pola súa banda, argumenta que "a razón detrás" desta vacinación é que tanto a conselleira delegada como o seu irmán "están a visitar centros de DomusVi por todo o país", en "contacto constante" con residentes e empregados, polo que "os médicos recomendáronlle vacinarse".
INTERVENCIÓN NO PARLAMENTO
O pasado novembro, a conselleira delegada de DomusVi, Josefina Fernández, interveu no Parlamento na comisión para a reactivación económica e social de Galicia, onde defendeu manter a colaboración público-privada no sistema de residencias, porque sitúa o seu custo "en niveis razoables" e cambialo podería facelas "inalcanzables".
O momento máis tenso da sesión produciuse cando, por parte da oposición, o deputado socialista Pablo Arangüena censuroulle porque "aínda non tivo a ben reunirse coas familias das vítimas" do coronavirus nas súas residencias. Tamén a acusou de tributar en "paraísos fiscais" e preguntoulle se o seu negocio "mellorou" por mor da súa "relación persoal" co presidente da Xunta, Alberto Núñez Feijóo.
Tras a intervención do socialista, o presidente da comisión, o popular Diego Calvo, pediu "desculpas" á comparecente e lembrou a Arangüena que se trataba dunha comisión "de estudo, non de investigación".
O BNG PIDE EXPLICACIÓNS E O PSDEG FALA DE ACTO "ESCANDALOSO"
O BNG esixe "explicacións inmediatas" á Xunta pola vacinación da conselleira delegada de DomusVi e o seu irmán, feito que o PSdeG tacha de "escandaloso".
Por unha banda, a deputada do Bloque Olalla Rodil reclama ao Goberno de Alberto Núñez Feijóo "que depure responsabilidades" e advirte de que "non pode tirar balóns fóra" ante esta vacinación "indecente".
Mentres, o socialista Pablo Arangüena afirma que "a amiga de Feijóo e conselleira delegada do imperio xeriátrico DomusVi non é persoal asistencial senón alta directiva e millonaria accionista". "A súa vacinación é un insulto á cidadanía e aos falecidos nos seus centros", subliña.
A nacionalista en que esta vacinación se produce "saltándose todos os procedementos establecidos no plan" e pregunta "como é posible que esta empresaria do grupo que xestionar o maior número de prazas privadas de residencias de maiores e o seu irmán acabasen nunha lista de vacinación sen ser colectivo prioritario".
Rodil rexeita que a Xunta alegue que "isto é un problema da empresa" porque "é responsabilidade" súa "que as vacinas cheguen seguindo escrupulosamente os plans". "E neses plans ningunha empresaria nin o seu irmán son colectivo prioritario", apostila.
