Primeiros sinais de alivio da presión hospitalaria en Galicia
A taxa de positividade sitúase por baixo do 4%. Os hospitalizados con Covid descenden en 39, os contaxios mantéñense no medio milleiro e os casos baixan.
- As UCIs galegas mantéñense nunha ocupación histórica malia a baixada de casos activos
- Sanidade pide precaución ante a posibilidade de que a variante británica da COVID aumente a súa incidencia
Por Europa Press / Redacción | SANTIAGO DE COMPOSTELA | 09/02/2021 | Actualizada ás 11:09
Os pacientes con Covid-19 ingresados en hospitais de Galicia descenderon en 39, seis deles menos en UCI e 33 menos noutras unidades de hospitalización. Ademais de aliviarse a presión hospitalaria, baixan os casos activos en 794 ata os 18.452 e os contaxios diarios mantéñense no medio milleiro --582, deles 489 confirmados por PCR nas últimas 24 horas--.
Así se desprende dos datos publicados na mañá deste martes pola Consellería de Sanidade con rexistros ata as 18,00 horas deste luns, nos que se reflicte que os pacientes con coronavirus en UCI baixan a 248 --seis menos que a xornada anterior-- e os hospitalizados noutras unidades descenden a 1.030 --o que supón 33 menos--.
Por áreas sanitarias, o maior descenso de hospitalizados corresponde á de Santiago e Barbanza, onde baixan a 45 os pacientes en UCI --dous menos-- e a 123 os que permanecen con Covid noutras unidades --dez menos--; mentres que na da Coruña e Cee, aínda que soben nun os ingresados en críticos ata os 86, descenden a 276 os que están noutras unidades --11 menos--.
Tamén o distrito sanitario de Ourense presenta unha redución de dez pacientes en unidades de hospitalización convencionais (151), mentres que os ingresados con Covid en UCI se manteñen sen cambios en 20; na de Vigo seguen en 29 os críticos e descenden a 139 os doutras unidades --seis menos--; mentres que na de Pontevedra e O Salnés caen nun os de UCI --e colócanse en 20-- e redúcense nun ata os 110 os doutras unidades.
Pola súa banda, a área de Lugo é a que presenta un maior descenso de pacientes en UCI, con catro menos, e colócase con 26 pacientes; pero ten un incremento de catro nos hospitalizados con Covid noutras unidades (72). E na de Ferrol, as persoas con coronavirus en críticos baixan nunha ata as 22, pero soben a 159 os doutras unidades --unha máis--.
CASOS E CONTAXIOS
Os casos activos de Covid en Galicia descenderon ata os 18.452, o que supón 794 menos. O maior descenso correspondeu á área de Santiago e Barbanza, con 208 menos --ten 2.724--; seguida da de Pontevedra e O Salnés, con 178 menos --2.305--; a de Vigo, con 134 menos --colócase con 3.012--; a de Ourense, con 105 menos --conta con 1.991--; a de Ferrol, con 65 menos --1.596--; a da Coruña e Cee, onde baixan en 58 ata os 5.103; e a de Lugo, onde caen en 46 ata os 1.721.
Pola súa banda, os contaxios diarios detectados con diferentes tipos de probas mantéñense no medio milleiro como a xornada pasada, ao sumar 582, polo que os contaxiados se sitúan en 105.283 en Galicia. Deles, 24.523 corresponden á área da Coruña e Cee; 19.919, á de Vigo; 17.107 á de Santiago e Barbanza; 14.020 á de Ourense; 11.399 á de Pontevedra e O Salnés; 10.970 á de Lugo; e 7.345 á de Ferrol.
Dos 582 contaxios diarios desta xornada, 489 foron confirmados por PCR nas últimas 24 horas. Deses 489 positivos, 172 foron na área da Coruña; 81 na de Vigo; 78 na de Pontevedra; 45 na de Santiago; 41 na de Lugo; 38 na de Ferrol e 34 na de Ourense. Ata a data realizáronse na Comunidade galega 1.520.795 probas PCR, o que supón 11.527 máis que as contabilizadas este luns en toda Galicia, segundo os datos de Sanidade.
POSITIVIDADE E FALECIDOS
En canto á taxa de positividade --porcentaxe de infeccións por test PCR realizados-- caeu a un 3,6% en Galicia, despois de baixar a un 4% na xornada anterior e situarse por primeira vez desde o 24 de decembro Galicia por baixo do 5% que marca a Organización Mundial da Saúde (OMS) para dar por controlada a pandemia.
As vítimas mortais con Covid durante a pandemia en Galicia aumentaron a 1.988 tras notificar nas últimas horas Sanidade o falecemento de 21 persoas. Destes últimos falecementos notificados, cinco corresponden con persoas usuarias de residencias e outra vítima procedía das vivendas comunitarias de Urzaiz, en Vigo.
Ata o momento curáronse 84.859 pacientes con Covid-19, o que supón 1.355 máis que as 83.504 persoas contabilizadas na xornada deste luns.
