A terceira onda comeza a remitir tamén nos hospitais
Baixa a presión hospitalaria e os contaxios diarios redúcense lixeiramente a 648 e a taxa de positividade repunta a un 6%.
Por Europa Press / Redacción | SANTIAGO DE COMPOSTELA | 12/02/2021 | Actualizada ás 11:10
As persoas con Covid-19 hospitalizadas en Galicia volvéronse a reducir con respecto á xornada anterior en 61 e sitúanse en 1.084, delas 228 en UCI. Tamén os casos activos seguen a tendencia descendente e caen en 749 ata os 15.894.
Así se constata nos datos publicados na mañá deste venres pola Consellería de Sanidade con rexistros ata as 18,00 horas deste xoves, nos que se reflicte que hai 856 persoas con coronavirus en unidades de hospitalización convencionais, 55 menos que a xornada anterior, e 228 en UCI, seis menos.
Os pacientes ingresados con Covid-19 descenden en seis das sete áreas sanitarias galegas, mentres que na de Vigo, aínda que se manteñen en 27 os hospitalizados en UCI, soben a 122 --cinco máis-- os que permanecen noutras unidades.
De novo o maior descenso de pacientes ingresados corresponde á área da Coruña e Cee, onde hai 75 en UCI --uno menos-- e 215 noutras unidades --19 menos--; seguida da de Pontevedra e O Salnés, con 20 --sen cambios-- e 100 --o que supón 14 menos--, respectivamente.
Na área de Ferrol soben en dúas os pacientes con Covid en UCI ata os 23, pero baixan a 119 os que están noutras unidades --14 menos--; mentres que na de Santiago e Barbanza caen a 40 o críticos --seis menos-- e baixan a 97 os doutras unidades --cinco menos--.
Pola súa banda, no distrito sanitario de Lugo descenden a 25 as persoas ingresadas en UCI con coronavirus --unha menos-- e a 66 as que permanecen noutras unidades de hospitalización --cinco menos--; e na de Ourense 18 continúan en críticos e baixan a 137 as que se atopan noutras unidades --tres menos--.
MENOS CASOS E MENOS CONTAXIOS
Galicia conta a día de hoxe con 15.894 casos activos, o que supón 749 menos que a xornada anterior e máis de 3.350 menos que ao comezo desta semana, na que se mantivo ata o momento a tendencia descendente. Este venres, os casos activos descenden en todas as áreas sanitarias que rexistran 4.590 no caso da da Coruña e Cee; 2.626 na de Vigo; 2.188 na de Santiago e Barbanza; 2.027 na de Pontevedra e O Salnés; 1.569 na de Ourense; 1.457 na de Ferrol; e 1.437 na de Lugo.
Deses 648 novos contaxios, 603 foron positivos confirmados por PCR nas últimas 24 horas. Deles, 232 na área da Coruña; 91 na de Vigo; 68 na de Pontevedra e O Salnés; 62 na de Lugo; 56 na de Ferrol; 52 na de Santiago e Barbanza; e 42 na de Ourense.
No que respecta á taxa de positividade --porcentaxe de infeccións por test PCR realizados-- subíu a un 6% tras roldar o 5% a xornada anterior despois de baixar a un 4% o luns por primeira vez desde o 24 de decembro e situarse nun 3,6% este martes. Con todo, colócase de novo por encima do 5% que marca a Organización Mundial da Saúde (OMS) para dar por controlada a pandemia.
