O número de casos COVID en centros galegos baixa dos 800 aínda que 34 aulas permanecen pechadas
Segundo fontes sanitarias, todas as áreas sanitarias rexistran un descenso na caída de casos activos.
Por Europa Press / Redacción | SANTIAGO DE COMPOSTELA | 03/03/2021 | Actualizada ás 15:50
O total de positivos detectados nos centros educativos galegos sitúase xa por baixo da barreira dos 800 casos, polo que Galicia mantén a súa tendencia de redución progresiva da incidencia da covid-19 tal e como se está rexistrando na sociedade xeral.
As autoridades sanitarias informaron este mércores de que as escolas e institutos galegos contan con 796 positivos, case 50 menos que no parte facilitado pola Xunta o día anterior, pero que manteñen pechadas polo menos 34 aulas en toda Galicia.
Todas as áreas sanitarias rexistran un descenso na caída de casos activos. A área de Coruña segue liderando a listaxe con 303 positivos e seis aulas pechadas. Os centros con maior número de casos nesta zona son o IES Monte das Moas con 19 positivos e unha unidade pechada e o privado Liceo A Paz con 12 casos.
Pola súa banda, a área de Pontevedra conta con 123 positivos (cinco menos) e sete aulas pechadas, mentres que a zona de influencia de Vigo sitúase en 120 casos (seis menos) e sete aulas. Entre eles, destaca o centro privado plurilingüe El Pilar, na cidade olívica, con 14 positivos e catro aulas clausuradas.
A área de Santiago, pola súa banda, rexistra 86 positivos (14 menos) e polo menos cinco unidades clausuradas, co La Salle de novo como o centro con máis casos (un trece).
Así mesmo, a área de Ferrol conta con 71 positivos e polo menos cinco aulas afectadas, sobre todo no centro privado Santiago Apóstolo de Narón con 12 casos e unha aula pechada.
Lugo, pola súa banda, sitúase en 68 positivos (13 menos) e dúas unidades, mentres que a área de Ourense conta con 25 casos(dous menos) e 2 aulas pechadas.
