900 veciños de Maside chamados a un cribado aleatorio mentres este concello permanece en vixilancia especial
O Sergas chama á poboación a participar no cribado, co fin de "limitar canto antes a posible transmisión ou aumento de casos, coa detección de asintomáticos".
Por E.P. | SANTIAGO DE COMPOSTELA | 16/03/2021 | Actualizada ás 17:09
A área Sanitaria de Ourense, Verín e O Barco realizará este xoves, 18 de marzo, un cribado poboacional selectivo aleatorio a 900 veciños de Maside, municipio que permanece en vixilancia especial polo comité clínico ante o seu elevado índice de incidencia, co fin de detectar casos asintomáticos de Covid-19.
Así o informou a área sanitaria ourensá, que explicou que o índice acumulado a 14 días en Maside sitúase en 406 casos por 100.000 habitantes, e de 332 a sete días. Con 11 contagios que rexistra actualmente, conta cunha taxa superior á do conxunto da provincia de Ourense, na que na actualidade 58 concellos "están libres de Covid-19", destacaron as mesmas fontes sanitarias.
Maside pasou o venres pasado a vixilancia especial para, en función da evolución, que o comité clínico tome decisións en canto a cambiar o seu nivel de restricións. En situación de especial vixilancia sitúanse tamén os concellos ourensáns de Carballeda de Avia, Coles e Leiro, a día de hoxe con dous, catro e tres casos activos, respectivamente.
"LIMITAR A TRANSMISIÓN"
Por iso, o Sergas chama á poboación a participar no cribado, co fin de "limitar canto antes a posible transmisión ou aumento de casos, coa detección de asintomáticos". As persoas seleccionadas aleatoriamente entre a poboación de 18 a 74 anos serán convocadas por unha mensaxe SMS, nas que se lles indicará hora e lugar da proba.
Os citados en Maside para o cribado, que se realizará con PCR, serán convocados no pavillón deportivo municipal entre as 15,00 e as 19,00 horas. Alí dous equipos formados por enfermeiras e técnicos de coidados auxiliares de enfermaría (TCAE) encargaranse das probas.
