Falece o historiador e expresidente da Real Academia Galega Xosé Ramón Barreiro
A súa carreira estivo vinculada á historia política de Galicia e exerceu unha importante traxectoria como divulgador de investigación.
Por Europa Press / Redacción | SANTIAGO DE COMPOSTELA | 17/03/2021 | Actualizada ás 18:04
O historiador e académico Xosé Ramón Barreiro faleceu esta madrugada na Coruña. Así o trasladaron fontes próximas ao docente que foi presidente da Real Academia Galega entre 2001 e 2010.
A súa carreira estivo vinculada á historia e en particular á historia política de Galicia, como conferenciante e relator en numerosos congresos sobre figuras como Rosalía e Otero Pedrayo, e exerceu unha importante traxectoria como divulgador de investigación con obras como 'A orixe litúrxica do Dereito Canónico' ou 'A estabilidade do beneficio'.
Así, foi recoñecido co Premio da Crítica nos anos 1985 e 2000, o Premio Santiago da TVG en 1987 ou a Medalla Castelao en 1991, entre outros, e entre os seus traballos destacan 'O carlismo galego' (1976) ou 'Historia Contemporánea de Galicia' (1981), ademais de 'A imprenta en Galicia' (1982) ou 'Historia da imprenta en Galicia' (1990).
TRAXECTORIA
Licenciado en Dereito Canónico na Universidade Gregoriana de Roma (1963) e en Filosofía e Letras pola Universidade de Santiago de Compostela, Barreiro estivo vinculado a esta institución como catedrático de Historia Contemporánea e vicerreitor no curso 1985-1986.
Así mesmo, foi director no Instituto de Estudos Xacobeos e secretario do Instituto de Estudos Galegos Pai Sarmiento durante tres anos, e membro da primeira directiva do padroado da Fundación Rosalía de Castro, ademais do Consello da Cultura Galega.
Barreiro tamén foi membro correspondente da Real Academia da Historia, a Real Academia de Córdoba de Ciencias, de Belas Letras e Nobres Artes e pertence á RAG desde 1971, na que ingresou como membro numerario en 1991.
Por último, o historiador sucedeu a Francisco Fernández del Riego como presidente da Real Academia Galega dende 2001 ata 2010, para despois pasar a testemuña a Xosé Luís Méndez Ferrín.
