Ames presume de colectores en forma de corazón para apoiar causas solidarias

O Concello de Ames instala colectores metálicos con forma de corazón con fins solidarios. Estes colectores están destinados á recollida de tapóns de plásticos, que se destinarán a causas solidarias e que ademais axudarán a reciclar ese produto. Os colectores xa se poden ver na praza do Concello e no aparcadoiro da Casa da Cultura. 

Estes dous colectores con forma de corazón servirán como proxecto piloto para comprobar a acollida que teñen entre a veciñanza, e espérase poder amplialos a outros puntos do concello. O alcalde de Ames, Blas García, confía en que a receptividade sexa positiva: "Estamos seguros de que a veciñanza de Ames que leva anos amosando a súa conciencia solidaria encherá en moi pouco tempo eses corazóns verdes".

A recollida selectiva de tapóns de plástico é habitual dende hai varios anos en diversas campañas solidarias, que venden o material recollido co obxectivo de recadar cartos para fins benéficos como a investigación de enfermidades raras. A reciclaxe selectiva permite asegurar unha segunda vida a estes tapóns, que se converten nun material denominado granza, utilizado para a fabricación doutros produtos.