A MIT de Ribadavia traerá a Jan Lauwers e a Christos Papadopoulos, na súa única parada en España
A Mostra Internacional de Teatro de Ribadavia recupera o carácter e a proxección internacional do festival ao tempo que fai unha aposta polo local.
Por Europa Press / Redacción | SANTIAGO DE COMPOSTELA | 29/06/2021 | Actualizada ás 20:17
A Mostra Internacional de Teatro de Ribadavia recupera o contacto de Galicia coa proxección internacional na súa nova edición deste ano cos espectáculos de Jan Lauwers e Christos Papadopoulos. O Concello de Ribadavia presentou este martes o programa para a 37 edición da Mostra Internacional de Teatro, que se celebrará entre os días 16 e 25 de xullo baixo a lema "A arte marca a diferenza".
O certame ourensán recupera este ano o carácter e a proxección internacional da man de mestres da escena mundial como Jan Lauwers e a súa prestixiosa compañía belga Needcompany ou a presentación do aclamado coreógrafo grego Christos Papadopoulos na súa única cita en España.
Os eixos temáticos desta edición serán o feminismo, a posverdade, a manipulación, a desmitificación do amor romántico e as fake news nunha edición que quere ser "expresión cultural, económica e turística" apostando polos espectáculos internacionais, pero tamén por destacadas compañías do panorama estatal como Voador, a Agrupación Señor Serrano ou Atalaia.
Así mesmo, busca fortalecer a escena galega apostando pola convivencia entre mestres internacionais e novos creadores locais coa programación de propostas de Sarabela teatro, Redrum teatro e Caxoto.
Serán dez días de intensa programación na que o director, Roberto Pascual, celebra que se recuperan espazos "singulares" de exhibición que o ano pasado, por mor da situación sanitaria, estiveron ausentes. Así, volverán incorporarse as obras na Franqueirán dentro do programa SputMIT, as funcións na Casa da Cultura, na igrexa de Madalena e na Alameda, ademais das do castelo.
En cada un dos distintos espazos, diferentes espectáculos que van desde pezas de danza vertical sobre fachadas ata obras de memoria histórica e cultural, representacións de teatro-circo ou contacontos para os máis pequenos.
PROGRAMACIÓN
A primeira obra será a estrea do espectáculo de Jan Lauwyers, 'Billy's Violenc' o 16 de xullo, que expón unha reflexión sobre a violencia nas dramaturxias de Shakespeare. Pola súa banda, porá o broche de ouro ao certame, o 25 de xullo, o artesán escénico, Manolo Alcántar, coa súa creación de teatro físico "Dejá Vu".
Con anterioridade, o 23 de xullo terá lugar una das datas crave desta edición da MIT. O coreógrafo Christos Papadopoulos, a estrela grega da danza contemporánea, visita por primeira vez Galicia para presentar en Ribadavia 'Elvedon', unha creación baseada na novela 'As ondas' de Virginia Woolf.
O espectáculo, que ten como fío condutor o paso do tempo, ten en Ribadavia a súa única cita dentro de España.
ACTIVIDADES PARALELAS
Ademais das distintas representacións teatrais, a MIT manterá os coloquios coas compañías tras as funcións e programará actividades paralelas para achegar as artes escénicas ao público.
Entre estas actividades está un taller sobre movemento escénico, dramaturxia visual e coreográfica de man de Amaya Galeote e Noemí Rodríguez ou a presentación do libro 'Historia de danza contemporánea na Galiza' do actual director da revista galega de teatro, Alfonso Becerra.
As entradas poderán ser adquiridas a partir do 1 de xullo en 'ataquilla.com' ou na propia oficina do festival nuns prezos que oscilan entre os 5 e os 10 euros dependendo do espectáculo.
