Canto levan os familiares de Feijóo e Romay da Xunta?

O Goberno de Alberto Núñez Feijóo mantén as súas adxudicacións millonarias á empresa Eulen, da que é apoderada Micaela Núñez Feijóo, irmá do presidente autonómico. En total, ao longo do 2013 recibiu máis de dous millóns de euros.

Segundo reflicte a web da Xunta www.contratosdegalicia.es, e tal e como publica elplural.com, o citado grupo de empresas recibiu este ano contratos desde diferentes consellerías e da Televisión galega.

Así, en xaneiro, a empresa da irmá de Feijóo foi adxudicataria dun contrato de 207.940,00 euros sen IVE da Consellería de Presidencia para o servizo de vixilancia e seguridade en varios edificios xudiciais da Xunta. Tres meses despois, en marzo conseguiu o contrato de servizos de conserxería , mantemento e limpeza das instalacións deportivas municipais do Concello de Fene, por 577.025,48 euros sen IVE.

O mellor mes, maio

En maio pasado, a Televisión de Galicia adxudicoulle a Eulen o contrato para o servizo de seguridade por preto dun millón de euros sen IVE, exactamente, de 930.000 euros. Non foron as únicas adxudicacións dese mes. Tal e como publica ese medio, tamén conseguiu o servizo de limpeza de edificios e locais municipais do Concello de Sade por 709.061 euros e o contrato da Consellería de Traballo e Benestar para a xestión do servizo público denominado Puntos de Encontro Familiar de Pontevedra e Vigo, por  357.000 euros.

Máis contratos en setembro

Ademais, en setembro, Eulen foi beneficiada co mantemento do edificio administrativo da Escola Galega de Administración Pública (EGAP), por 41.500 euros e recibiu da Consellería de Traballo e Benestar a adxudicación do servizo de control das instalacións do Centro Coordinador de Información e Documentación Xuvenil, por 21.340, 80 euros.

Non son as únicas adxudicacións cuestionables do presidente galego, que en xaneiro deste ano deu o contrato para o desenvolvemento do portal das entidades locais de Galicia, un plan cofinanciado polo Fondo Europeo de Desenvolvemento Rexional, á empresa Atos Origin, da que é apoderada a sobriña de José Manuel Romay Beccaría, presidente do Consello de Estado. Unha adxudicación de 455.000 euros.

A empresa da sobrña de Romay

Segundo denunciou Galicia Confidencial, a empresa da sobriña de Romay Beccaría, con sede en Madrid, recibiu case medio millón de euros por actualizar unha web xa existente.

Hai un mes, a mesma axencia da Xunta contraba a Atos para un "servizo complementario de evolución e mantemento de sistema de xestión de persoal da Xunta" por 135.755 euros sen IVE.  Segundo recolle o Rexistro Mercantil, Carmen Martín de Pozuelo Romay é a apoderada desta consultora, que suma 4,6 millóns en contratas do Goberno galego.

Colaboradora de Feijóo en Correos

Feijóo fichou a Martín de Pajuelo para o seu equipo cando dirixía Correos e tamén cando estivo como conselleiro de Política Territorial. A Xunta de Galicia, canto menos, deu cinco contratos a Atos Origin a dedo desde que goberna Alberto Nuñez Feijóo que suman 312.000 euros.