O Gaiás acolle a obra de cinco mulleres que "conectan" Galicia e México
A centro da Cidade da Cultura converterase nunha das sedes das Residencias Charco.
Por E.P. | SANTIAGO DE COMPOSTELA | 31/07/2021 | Actualizada ás 19:02
O Museo Centro Gaiás da Cidade da Cultura convértese en 2021 nunha das sedes das Residencias Charco, unha iniciativa de intercambio artístico que busca "profundar na conexión cultural entre España e Latinoamérica", en concreto, entre México e Galicia.
Así, tal e como explicou a Consellería de Cultura, Educación e Universidade nun comunicado, entre o 1 de xullo e o 6 de outubro, dúas artistas mexicanas e outras dúas galegas "conectarán creativamente as dúas beiras do Atlántico" mediante catro propostas artísticas entre Galicia e México.
Esta experiencia intégrase no Programa de Residencias Artísticas do Gaiás (REGA), "un viveiro cultural e creativo que pon os espazos,recursos e equipos técnicos da Cidade da Cultura ao servizo de proxectos vinculados á música, a escena, a danza e as artes performativas, a literatura e as artes visuais".
O programa arrincará co lanzamento de cinco residencias creativas, desenvolvidas en colaboración con outras institucións e colectivos culturais, "para consolidar o Gaiás como viveiro creativo".
CATRO MULLERES ARTISTAS
A quinta edición do programa Charco de residencias apóiase nun proxecto curatorial de Susana González, coordinadora do programa e fundadora de Consultarche, "que pivota sobre o concepto de tránsito coa idea de profundar na conexión entre territorios e no vínculohistórico migratorio, para así propiciar un contexto estimulante cara á creación visual".
Con este obxectivo convídase a catro artistas mulleres a reflexionar sobre as relacións intercontinentais. Así, Mariana Castelo Deball (Cidade de México, 1975), Julia Huete (Ourense, 1990), Fritzia Irizar (Culiacán, México, 1977) e Carme Nogueira (Vigo, 1970) son lascreadoras seleccionadas para participar nesta edición do programa.
As obras resultantes da estancia artística das creadoras en Galicia serán expostas na Cidade da Cultura como paso previo ao seu itinerancia por diversas institucións do Estado. As creacións das artistas galegas, pola súa banda, tamén serán exhibidas en diversas institucións de México.
