Desaloxada a sala Yago de Compostela, okupada desde o pasado xoves
Axentes da Policía tomaron o cinema sen incidentes.
Por Galicia Confidencial | Compostela | 17/02/2014 | Actualizada ás 12:05
Catro días. Ese foi o tempo que a Sala Yago de Santiago estivo okupada. É a segunda vez que este espazo cultural sufre un okupación debido ao seu abandono.
Desta volta, e a diferencia do acontecido hai dous anos, non se viviron momentos tensos nin houbo cargas policiais. Os axentes da Policía actuaron de xeito diferente.
Así, antes de proceder a entrar no edificio, cortaron os accesos a céntrica Rúa do Vilar. Unha vez feito isto, entraron no seu interior sen moita resistencia. Segundo informan algúns medios os "mozos que se atopaban dentro saíron coas súas cousas na man, sen que se rexistrase ningún tipo de incidente".
Foi o pasado xoves cando un grupo de mozos volveu okupar esta sala, tal e como tamén aconteceu en novembro de 2011. Daquela houbera unha carga policial e varios detidos.
A okupación, como a anterior, foi considerada "ilícita" polo rexedor compostelán, Ángel Currás, que dixo que isto non tiña nada ver con cuestións culturais, a pesares de que durante os últimos días este espazo estivo aberto ao público para que disfrutara de actividades culturais.
