SOS OURENSE!!!

O Concello de Ourense dende hai dous anos camiña nunha deriva na que todo o andando en épocas anteriores está a ser ou abandonado ou desfeito.

Por Manuel H. Iglesias | Ourense | 08/11/2021

Esta institución capitaneada por xente carente de ética política, está levando á terceira cidade de Galicia a un desprestixio que avergoña a milleiros de Ourensás que nunca maxinaron que se podería chegar a esta situación.

Os cidadáns desta Auria vivimos unha etapa tan esperpéntica no Concello que somos o faime rir de todo o Estado. E non é unha esaxeración, pois temos un alcalde carente da mais elemental ética que sobrevide co apoio de dous concelleiros do seu grupo e co silencio dos representantes do partido popular que serven de paraugas, pois estes non fixeron máis que pór pegas pra facer unha moción de censura que trocara esta grave situación. A día de hoxe hai un equipo de goberno que é incapaz de afrontar os graves problemas que ten o concello como o de aprobar o PXOM ou renovar moitos servizos públicos que están en precario. A isto hai que sumarlle o non funcionamento doutros servizos que son a bandeira desta cidade cara o exterior. Desta maneira están pechadas sen data a piscina das Burgas, e as charcas de Outariz e a Chavasqueira., símbolos para unha cidade que presume de ter milleiros de litros de auga quente. Igualmente acontece coa perda de subvencións para a reforma da Praza de Abastos e a carencia de mantemento de rúas e beirarúas onde todo está nun estado lamentabel; onde non se repoñen as arbores secas ou, onde os parques e os xogos para os mais cativos están desfeitos e cheos de lixo.

Mais nestes dous anos de mandato a obsesión por derrubar todos o relacionado coa cultura e a súa marca foi o obxectivo principal da alcaldía. E seguindo as súas obsesións tomouna coa chamada Universidade Popular expulsándoa das súas aulas; actuou vehemente contra a banda de música ata facela desaparecer; machacou o festival Pórtico do Paraíso; pechou o Auditorio e o museo municipal da rúa Lepanto, foi incapaz, aínda coa pandemia, de organizar unha sinal das festas tradicionais como o Corpus e os Maios semellante ó que fixeron noutros lugares asociacións e concellos. Encheu o Concello de asesores e contratou a un City Manager con un soldo estratosférico que non se sabe se valen pra algo máis que pra branquear cos seus informes, os caprichos e as ocurrencias do sr. Jácome. Mais este alcalde coas súas obsesións e contratos de técnicos menosprezou ós técnicos do concello como si estes non valeran ren.

Ourense vive un tempo de desleixo en todos os sentidos, e un tempo de descrédito no eido das política co deterioro da institución onde mal gobernan o alcalde co silencio dos que o manteñen no cargo. A sensación que percibimos os cidadáns é que no concello os que mandan soamente pensan e traballan para o seu. E que a cuestión pública só queda pra lanzar ó vento novas sen base que non son máis ca fogos de artificio. En Ourense chegamos á contradición de que o que antes pedía dimisións e denunciaba a todos diante a xustiza, agora está a rirse de todos os ourensás facendo o contrario do que prometeu no seu día. Pois só está no poder co obxectivo e manterse a toda costa en aras, din as malas linguas, de facer caixa.

En fin, diante esta situación tan excepcional somente queda que os cidadáns o 18 de novembro tomen a palabra e amosen o seu malestar na rúa pedindo dignidade e ética na política; reclamando o bo funcionamentos dos servizos; esixindo un axeitado mantemento e reparación dos parques e xardíns; reclamado que a cultura teña o seu espazo dentro da política municipal; pedindo que os proxectos que se fagan sexan motivo de amplos consensos e non sirvan pra dilapidar os cartos públicos en obras innecesarias con custes moi elevados no seu mantemento. Obras soamente pensadas pra satisfacer o capricho deste alcalde. Ourense non pode seguir nesta situación de demolición controlada coa aquiescencia dos populares. Ourense precisa dignidade na política e autoridades que sexan escoitadas en institucións superiores para acadar proxectos que melloren a vida dos ourensás.