Unha biblioteca en Castrelo de Miño convertida en almacén por "nulo interese" dos gobernantes pola cultura

Na parroquia de Macendo, no municipio ourensán de Castrelo de Miño, púxose en funcionamento durante os meses estivais unha pequena biblioteca nun local cedido polo Concello. Foi un espazo que agora a mesma institución converteu en almacén para ferramentas e material dun taller de albanelaría.

"Hai un nulo interese pola cultura neste recuncho do rural ourensán por parte dos seus gobernantes", lamenta Elizabeth Garrido, profesora do IES As Lagoas de Ourense e veciña da parroquia onde ela mesma foi a promotora da iniciativa.

"Este verán propúxenme catalogar a gran cantidade de material bibliográfico que posúo e colocalo no baixo da miña casa para ofrecelo a quen quixese dispor de libros, ben de consulta ou ben de lectura particular", explica Garrido, quen traslada que o proxecto foi moi ben acollida especialmente por un dos concelleiros, o de Cultura, quen mesmo a animou a solicitar ao Concello un local público.

Así o fixo. Pediu o baixo da antiga escola do pobo, unha edificación que pasou a mans do Concello cando se converteu en consultorio médico dous días á semana, pero que permanecía en desuso desde facía máis de seis anos.

No escrito, solicitou o emprego do local ata setembro o sete días da semana, unha hora pola mañá e outra pola tarde. Despois, de setembro a xuño, tempada na que a poboación da parroquia diminúe, pasaron a ser dúas horas todos os fins de semana.

O visto e prace do alcalde, Avelino Pazos (PP), chegou o 3 de agosto e, tras recoller as chaves, ela e unhas veciñas encargáronse da limpeza e o acondicionamento do local, que finalmente transformaron nunha biblioteca.

"Púxenme en contacto co CEIP Castrelo de Miño para saber a súa opinión e ao claustro pareceulle unha idea marabillosa. Xa planeamos actividades cos nenos e propuxémonos realizar lecturas nunha das salas e solicitar axudas para animación á lectura, contacontos e a celebración de días conmemorativos", relata Elizabeth Garrido.

Así xurdiu o nome de 'Oitopés Macendo', acordado co colexio como unha ramificación da súa biblioteca escolar que "aos poucos comezou a dar os seus froitos". "Os pais empezaron a acompañar aos seus fillos e a levar libros de lectura para todos os de casa. Ademais, desde o resto de municipios chegaron caixas con libros cedidos e doados", conta. Un día, mesmo se xuntaron varios nenos e propúxolles pintar nunha tea o nome da biblioteca para colgalo da fachada do edificio. E alí ondeou, ata que esta semana deixou de facelo.

DE BIBLIOTECA A ALMACÉN DE ALBANELARÍA

"Recibo unha notificación do alcalde na que, tras felicitarme pola iniciativa, indícame que o Concello puxo en marcha un taller de albanelaría e que necesitan o espazo para gardar ferramentas e material, e que se quería seguir co local puxéseme en contacto para ver a forma de compartilo", denuncia.

Garrido, quen escribiu preguntando como se compartiría, asevera que o Concello dispón de "moitos outros locais" para exercer de almacén máis preto de onde levará a cabo o taller en cuestión.

Pero, antes de recibir a súa resposta, afirma que "o alcalde, xunto con máis persoal do concello", sen comunicarllo por escrito, "accederon ao edificio e retiraron o letreiro". Por iso, esixe unha explicación respecto diso e critica "a celeridade coa que queren destruír unha iniciativa carente de ningún outro fin que non sexa culturizar".

XUSTIFICACIÓN DO ALCALDE

A explicación do rexedor municipal, Avelino Pazos, é que na parroquia está prevista a restauración de varias fontes, polo que o taller de albanelaría impartirá a súa formación previa nas instalacións.

Con todo, asegura que "axiña que falemos", darase a opción de compartir o local ou de buscar outro na mesma parroquia.

Casa do Concello de Castrelo de Miño | Fonte: Wikipedia