Primeiras actividades en Valdeorras para honrar a Florencio Delgado Gurriarán
O proxecto 'As Letras de Florencio' programa un roteiro por Córgomo, vila natal do poeta, e vén de estrear un podcast para achegar ao autor ás novas xeracións.
Por X.M. Fernández | Vilamartín de Valdeorras | 06/02/2022 | Actualizada ás 10:00
As Letras Galegas deste ano dedícaselle ao intelectual valdeorrés Florencio Delgado Gurriarán, e dende o seu Córgomo natal vanse realizar numerosas actividades promovidas polo proxecto cultural “As letras de Florencio” --integrado por varios concellos de Valdeorras e co apoio da Deputación de Ourense e da Xunta de Galicia--.
A primeira delas será este domingo 6 de febreiro e consistirá nun roteiro pola aldea que viu nacer e tanto inspirou a este autor. Co nome de “Ruada con Florencio polas Candeas” farase unha visita que terá como guía a Fernando Santalla, veciño e familiar do homenaxeado, que “axudará a mirar cos ollos do Florencio máis mozo, descubríndonos episodios históricos e outros persoeiros da aldea".
O roteiro partirá ás 16:30 h. da Praza do Pobo de Córgomo, en Vilamartín de Valdeorras, e non é preciso inscrición previa.
PODCAST SOBRE FLORENCIO DELGADO GURRIARÁN
Este proxecto, que impulsa tamén 'As letras de Florencio', é unha creación do xoven escritor e activista cultural valdeorrés Jorge Moral, que ademais será o condutor do mesmo. Consta de doce capítulos que se publican no último domingo de cada mes durante este 2022. O primeiro fíxose xa este pasado 30 de xaneiro, baixo o título "Do que non se fala, pouco se sabe", e tratou sobre as facetas humana, política e literaria de Florencio.
Jorge Moral atópase de Erasmus en Utrecht e desexa que o podcast contribúa a crear un discurso colectivo sobre Florencio Delgado Gurriarán. En palabras del, "hai bastante investigación formal sobre o autor pero falta divulgación, facer a súa obra e traxectoria máis accesibles, sobre todo para a xente nova, afeita a que se nos conte a cultura cuns códigos que non son os nosos".
