A Xunta iniciará a finais de marzo as obras de ampliación do CHUO
Di que investirá 52,6 millóns e xerará uns mil empregos
Por E.P. | Ourense | 07/03/2022 | Actualizada ás 15:31
A Xunta asinou este luns a acta de reformulación das obras de ampliación do Complexo Hospitalario Universitario de Ourense (CHUO), que se iniciarán a finais de marzo cun investimento de case 52,6 millóns de euros e xerarán case mil empregos.
No marco deste proxecto, informou a Xunta, construirase un novo edificio de hospitalización e reformarase o actual Hospital Materno Infantil, á vez que se mellorarán os accesos, cun incremento da superficie construída nun 11%, ata superar os 136.000 metros cadrados.
A conselleira de Infraestruturas e Mobilidade, Ethel Vázquez, e o titular de Sanidade, Julio García Comesaña, xunto co delegado territorial da Xunta en Ourense, Gabriel Alén, e o xerente da área Sanitaria de Ourense, Verín e O Barco de Valdeorras, Félix Rubial, presidiron a firma do documento por parte da dirección da obra da Xunta e da empresa adxudicataria, a UTE formada por Copasa e o Grupo Puntes.
A firma deste documento, explica a Xunta, supoñen o comezo da execución efectiva do contrato e, engade, "permite avanzar na preparación dos traballos para iniciar este mesmo mes a construción dun novo edificio de hospitalización e para reformar o actual Hospital Materno Infantil, á vez que se melloran os accesos".
A conselleira de Infraestruturas indicou que o prazo das obras ascende a 40 meses, que se tentará acurtar durante a execución dos traballos. Con todo, apuntou, o obxectivo da Xunta pasa por lograr fitos: un primeiro, que a finais de 2023 poida estar finalizado o novo edificio, para proceder ao traslado do Materno Infantil e poder iniciar a reforma integral do edificio actual.
Pola súa banda, o conselleiro de Sanidade indicou que a ampliación do CHUO coincidirá en paralelo con outras dúas reformas: a obra da UCI, cun investimento de nove millóns; e o novo servizo de Medicamento Nuclear, no que se avanzou a pasada semana no marco do Consello da Xunta. Este servizo conta cunha previsión de 5,5 millóns para as obras e o equipamento de alta tecnoloxía que consistirá en dúas novas gammacámaras e un equipo PET-TC de nova dotación.
