A Garda Civil intensificará en Galicia o control de motocicletas e ciclomotores para reducir feridos e falecidos
O ano pasado, o 16% dos mortos en sinistros viarios eran usuarios de motos.
Por Europa Press / Redacción | Santiago de Compostela | 28/04/2022 | Actualizada ás 17:01
A Garda Civil en Galicia elaborou un "plan específico" para as estradas galegas no marco do que intensificará o control de motocicletas e ciclomotores co obxectivo de "reducir o número de feridos e falecidos" na rede viaria. Segundo informou o Instituto Armado, trátase de mellorar a seguridade de motoristas en cumprimento dos obxectivos operativos marcados pola 'Estratexia de Seguridade Viaria da Dirección Xeral de Tráfico'.
En Galicia, o ano pasado 2021, o 16 por cento dos falecidos en sinistros viarios neran usuarios de motocicletas, informou o Instituto Armado. Na comparativa co resto de España, case o oito por cento dos motoristas falecidos o ano pasado fórono nas estradas galegas, sinalou a Benemérita.
Coa chegada do bo tempo, engadiu, "increméntase significativamente o número de usuarios que fan uso deste tipo de vehículos", sobre todo en desprazamentos de lecer, o que, avisa, "provoca un aumento no número de sinistros deste colectivo vulnerable".
O obxectivo, segundo a Garda Civil, "é conseguir que a circulación polas estradas galegas sexa totalmente segura para todos os usuarios". "Para iso tentaremos garantir a seguridade viaria, erradicando a circulación arriscada e perigosa de motocicletas e ciclomotores, así como a de usuarios doutros vehículos que as poñen en risco", advirte.
Para iso, indicaron, "levarán a cabo as accións necesarias para reducir a sinistralidade e así evitar no posible as consecuencias que leva para os usuarios deste tipo de vehículos".
Deste xeito, intensificarase a vixilancia e control, de forma permanente, en vías convencionais e naquelas datas e horarios (principalmente sábados tarde, domingos e festivos, de maneira especial con meteoroloxía favorable), nos que "existe un incremento notable de circulación deste tipo de vehículos e especialmente, unha maior sinistralidade e existencia de infraccións".
"Con especial atención á condución temeraria, os excesos de velocidade, o adiantamento antirregulamentario e a insuficiente distancia de seguridade", abundou. E prestaranse servizos específicos de control de velocidade, realizaranse dispositivos de verificación de alcol e drogas e especialmente traballarase na detección e prevención de conducións arriscadas ou perigosas.
"Unha preocupación motivada polos 78 motoristas detectados superando as taxas de alcol permitidas ou con presenza de drogas no organismo durante o primeiro trimestre de 2022", conclúe.
