A metade dos pensionistas en Galicia sobrevive con menos de 780 euros mensuais
As mulleres perciben un terzo menos que os homes e As Pontes segue á fronte dos municipios con mellores pensións.
Por Europa Press / Redacción | SANTIAGO DE COMPOSTELA | 17/06/2022 | Actualizada ás 13:38
A pensión media en Galicia situouse ao termo do ano 2021 en 1.011,09 euros, aínda que case a metade das persoas pensionistas galegas perciben retribucións inferiores a 780 euros, dos cales, un 10% non chega a 505 euros. Así se desprende dos datos publicados este venres polo Instituto Galego de Estatística (IGE) sobre o balance anual das pensións contributivas en Galicia.
En total, hai 671.786 persoas que perciben pensións contributivas da Seguridade Social, das cales o 50,4% son mulleres, quen cobran un 33% menos que os homes. Case o 81% do total de pensionistas teñen 65 anos ou máis, unha franxa etaria entre a que se sitúa o grupo maioritario de persoas que perciben pensións contributivas: os que teñen entre 65 a 74 anos --127.605 homes e 107.725 mulleres--.
Da análise por franxas de idade despréndese que os homes cobran máis que as mulleres en todos os grupos, especialmente nos tramos coas retribucións máis altas, é dicir, os de 55 a 64 anos (un 38% máis) e entre 65 a 74 (case un 33%). Outro dato que reflicte a desigualdade entre sexos está en que máis do 25% dos homes teñen pensións por encima dos 1.400 euros, unha contía que só exceden o 10% das mulleres pensionistas.
A CORUÑA E PONTEVEDRA, Á CABEZA
En canto ás provincias, a media na Coruña (1.047,21 euros) e Pontevedra (1.048,82) pasa a media galega con máis de 1.000 euros en ambas, un limiar ao que non chegan Lugo (942,31) e Ourense (890,72 euros).
As provincias atlánticas tamén son as que concentran o maior número de pensionistas, pois suman máis do 70% das persoas que perciben pensións contributivas --A Coruña o 39,7% e Pontevedra, o 32,1%-- mentres que Lugo e Ourense achegan o 12,1% e o 11,3%, respectivamente; unha distribución que coincide coa repartición de poboación galega.
Así as cousas, o número de pensionistas en Galicia incrementouse un 5,8% na última década. De novo, a realidade demográfica galega déixase ver neste apartado, cun aumento do 11% do total de pensionistas en Pontevedra e caídas en Lugo e Ourense. Deste xeito, o importe medio da pensión en Galicia aumentou en 225,63 euros, un 28,7% respecto dos datos de 2011, coa Coruña á cabeza (28,8%) e Ourense á cola (27,3%).
AS PONTES, MÁIS ALTAS; AVIÓN, MÁIS BAIXAS
Un ano máis, As Pontes de García Rodríguez é o municipio coas pensións máis altas, cunha media de 1.525 euros, seguido de Fene con 1.343 euros e Cervo con 1.385. Ferrol e A Coruña, con 1.277 e 1.230,09, respectivamente, pechan a táboa dos cinco concellos con pensións máis altas.
No outro extremo sitúase Avión, onde os seus pensionistas cobran unha media de 627 euros, e Santa Comba, no que perciben 681 euros. Padrenda con 685, Tordoia con 689 e Baltar con 689 euros, son os outros concellos coas pensións medias máis baixas de Galicia.
En xeral, o 60% dos municipios teñen medias de menos de 881 euros e só en 54 se superan os 1.000 euros. Por zonas, as pensións máis altas están nas áreas das sete cidades, a Mariña luguesa, Valdeorras, As Pontes, Bueu, o Barbanza, Baiona e Cee. A media galega é superada nas grandes cidades, con Ferrol, A Coruña e Vigo con pensións por encima dos 1.205; mentres que en Ourense o importe medio é de 1.044,66 euros; o máis baixo das sete urbes.
XUBILACIÓNS
Os datos do IGE reflicten que o número de persoas que en Galicia perciben unha prestación por xubilación aumentou durante o período entre 2014 e 2021 tanto para homes (10.493 máis) como para mulleres (12.130). Con todo, o ano 2020 deixou un descenso notable entre os homes, con 1.643 pensionistas menos como consecuencia da pandemia.
A Coruña e Pontevedra absorben este crecemento mentres que Lugo e Ourense manteñen a súa tendencia á baixa. En canto aos importes medios, crecen máis as altas que as baixas, cun aumento de 175 euros entre as primeiras desde 2014 por só 140 entre as baixas.
