O comité de Alcoa, satisfeito coa empresa, apunta a setembro como o mes "clave" para os investimentos

O comité de Alcoa San Cibrao, José Antonio Zan, apunta a setembro como o mes "clave" nos investimentos para esta planta do concello de Cervo. Sinala que se verán "avances" como que as barras de compensación comezarán a cambiarse a un ritmo de "oito por semana".

Tras unha nova reunión de seguimento sobre o futuro da fábrica de Alcoa --na que participaron representantes de traballadores, empresa e administracións--, Zan explicou que o próximo encontro terá lugar o 15 de setembro. Entón, poderase avaliar como evolucionan diferentes compromisos que "seguen o seu plan inicial".

Respecto diso, apunta que se está "moi preto" de asinar outro contrato de subministración de enerxía a longo prazo (PPA) tras o xa selado con Greenalia. Indica que o máis importante será o que se peche con Endesa, que "fai de paraugas" ao resto de PPA.

Agradece o traballo dos técnicos da Xunta e goberno para licitar e levar a cabo parques eólicos, pois "é bo que estean a traballar en conxunto", algúns dos cales están "moi avanzados".

Máis aló da enerxía renovable, Zan asegura que o "compromiso por parte de Alcoa de rearranque é firme e independente das PPA", o cal se prevé para 2024.

A este respecto, indica que coas PPA será "moi difícil aplicar outro ERE", dado que ofrece "un prezo enerxético que garante que non temos que pechar".

Entre outros compromisos, valora que se cumpre o acordo coas auxiliares ao incrementar o gasto un 8%, así como coas empresas de transporte (xa son o 84% da comarca).