Novo incidente cun tren en menos dun día... descarrilado outro en Quiroga por un corremento de terra
Outro foi golpeado por outro desprendemento de pedras en Ribas de Sil.
Por Europa Press / Redacción | SANTIAGO DE COMPOSTELA | 27/08/2022 | Actualizada ás 13:41
O tren Alvia que este venres realizaba o traxecto Barcelona - Vigo descarrilou á altura do municipio lucense de Quiroga por mor dun desprendemento de terra. Ningún dos 191 pasaxeiros que viaxaban no convoi resultou ferido. É o segundo tren afectado en menos dun día tras un incidente semellante que golpeou ao tren Barcelona-Madrid.
Pasadas as 21,00 horas, saíu da vía, segundo informa o 112, o primeiro eixo da primeira composición do tren. O servizo de emerxencias recibiu o aviso do descarrilamento a través de Adif. Segundo indicaba o seu persoal, os feitos sucederan entre San Clodio de Ribas de Sil e O Freixeiro, á altura do punto quilométrico 500 da N-120.
Con estes datos, o 112 requiriu a intervención do GES de Quiroga-Folgoso do Courel, das Agrupacións de Voluntarios de Protección Civil de Quiroga e de Ribas de Sil e dos axentes da Garda Civil, que colaboraron co persoal de seguridade de Adif no transbordo dos pasaxeiros a outro tren, procedente de Ponferrada, que levou á pasaxe ata a estación de San Clodio, onde esperaban varios autobuses para levar aos pasaxeiros aos seus destinos.
O desprendemento de terra, tal e como confirmaron Renfe e Adif, provocou o desvío doutros trens. Así, os viaxeiros do Alvia 621 que realizaba o traxecto Vigo-Barcelona ás 6,30 horas tiveron que viaxar por estrada entre Vigo e Ponferrada. Xa de Ponferrada a destino, a viaxe continuou en tren.
