A Xunta propón limitar a 100 persoas o acceso diario a Areoso

A conselleira de Medio Ambiente, Ángeles Vázquez, presentou este sábado a orde que establece os usos permitidos en Areoso e na Illa da Rúa e que regula por primeira vez o acceso diario de embarcacións e persoas, propondo un máximo de 100 persoas ao día a partir de Semana Santa.

Así, Vázquez incidiu en que esta nova orde ten por obxectivo establecer as normas relativas ao uso público e actividades recreativas neste espazo natural para garantir a conservación dos hábitats e das especies de flora e fauna silvestre que atesoura este conxunto de illotes.

Como principal novidade, esta orde expón o establecemento dunha cota diaria tanto para o fondeo de embarcacións como para a visita aos illotes.

Así, en tempada alta -do 15 de maio ao 30 de setembro e Semana Santa- permitiranse ata 20 fondos e 50 persoas por cada un das quendas -mañá e tarde-, mentres que, en tempada baixa, o límite será de 10 fondeos e 20 persoas por quenda. No caso das visitas aos illotes, a recomendación é facela en grupos de non máis de 20 persoas, acompañados dun guía -5 en tempada baixa- e evitarase a coincidencia dos grupos.

A maiores, tamén se regula a atracada de embarcacións relacionadas coas actividades de uso público nos illotes, que deberá efectuarse sobre o medio litoral para preservar os hábitats e as especies. O número de autorizacións oscila entre as 10 e as 12 embarcacións por quenda en función de se a embarcación ten motor ou non --en tempada alta--, mentres que en tempada baixa o límite estará en cinco embarcacións por quenda.

No que respecta aos usos e actividades que se prohiben, a conselleira destacou a acampada; a caza e a pesca recreativa ou deportiva; a recolección de especimenes e mostras biolóxicas, animais e plantas; a práctica do botellón e o lume; o emprego de aparellos de son que perturben a tranquilidade do hábitat, e calquera modalidade de publicidade exterior.

Fai falta destacar que esta norma establece como actividades permitidas, entre outras, o tránsito a pé na área terrestre, o submarinismo en apnea sen pesas e o baño na modalidade de snorqueling. E, a maiores, inclúe a posibilidade de realizar actividades recreativas ou culturais, sempre que non alteren o estado de conservación dos hábitats.

Para concluír, Vázquez indicou que este documento se someterá a información pública e audiencia aos interesados desde o vindeiro martes, 18 de outubro, ata o 8 de novembro, co obxectivo de que entre en vigor a próxima Semana Santa.