Alcoa quere recuperar o fuel para producir en San Cibrao polo alto prezo do gas natural

O Diario Oficial de Galicia (DOG) publica este luns o anuncio da Dirección Xeral de Calidade Ambiental polo que se somete a información pública a solicitude de modificación substancial da autorización ambiental integrada outorgada a Alúmina para o complexo de Cervo.

A dirección de Alcoa xa trasladara a finais de setembro aos sindicatos que analizaba medidas para liquidar as perdas por cada tonelada producida na planta de alúmina, situación que atribuía ao elevado prezo do gas natural, e que unha das alternativas que estaba sobre a mesa era recuperar o fuel en parte do proceso produtivo da refinaría de San Cibrao, en Cervo.

En concreto, segundo consta na descrición da modificación, pídese autorización para utilizar fuel óleo no foco de calcinación da planta de alúmina e así "dotala de flexibilidade na elección do combustible".

Fontes da Consellería de Medio Ambiente inciden en que este anuncio responde á intención da planta de volver usar combustibles fósiles "de forma temporal e puntual como resposta á alza de prezos do gas".

A modificación da súa autorización ambiental integrada (AAI) actual é substancial, motivo polo que se ten que someter de novo a trámite ambiental.

En canto ao sentido da resolución, o departamento autonómico sinala que haberá que esperar a que os órganos sectoriais se pronuncien e, en vista do seu posicionamento, proceder ou non a autorizar a modificación con ou sen condicionantes ambientais.