"Os servizos de urxencia do CHUS está instalados nunha situación permanente de colapso"

A Asociación de Pacientes e Usuarios do CHUS, o Hospital Clínico Universitario de Santiago, denuncia que os seus servizos de urxencia, "co consentimento dos responsables do servizo e da xerencia, están instalados nunha situación permanente de colapso", con pacientes "aparcados nos corredores de acceso en padiolas e cadeiras de rodas ou almacenados na sala de observación agardando por unha cama en planta".

A Asociación de Pacientes tivo coñecemento, segundo traslada nun comunicado, de que o pasado día 21 de outubro ás 15:00 horas, nove pacientes cualificados como graves estaban 'aparcados' nos corredores de acceso do servizo, "padecendo a vulneración do seu dereito á intimidade e dignidade". Ademais, proseguen, 33 pacientes estaban pendentes de ingreso, dos cales tres "levan desde o día 19 na sala de observación agardando por unha cama hospitalaria".

"A normalización do colapso das urxencias por parte da xerencia e dos responsables do servizo está xerando un estado de desconfianza na poboación que obriga a moitos a ter que acudir á sanidade privada", explica a asociación. Así mesmo, esta situación produce, alertan, a "deslexitimación do sistema público de saúde, que redunda nun proceso de demolición programado".

"Como é posible que se manteñan pacientes máis de 48 horas agardando por unha cama hospitalaria cando nas últimas 24 horas o nivel de ocupación do clínico, segundo os datos publicados no Pulso do CHUS, era do 49 por 100? Como é posible que se almacenen 33 pacientes na sala de observación, que non garante a intimidade, cando no hospital Gil Casares existen camas dispoñibles pechadas desde o 12 de agosto? Como se pode manter a 3 pacientes máis de 48 horas en observación cando os protocolos e recomendacións sanitarias din que non poden permanecer nesa situación mais de 24 horas?", pregúntanse dende a asociación.

Pacientes e usuarias denuncian a "impunidade" para continuar con estas prácticas, a pesar das recomendacións da Valedora do Pobo sobre o dereito á intimidade e dignidade. Así, critican que a xerencia "siga permitindo que o servizo de urxencias sexa un almacén no que a sobrecarga de atención impide ao persoal sanitario dar unha atención de calidade"; e que os responsables da área e o xefe de servizo "fagan caso omiso das súas obrigas éticas".

Desde a Asociación de Pacientes e Usuarios do CHUS teñen "a convicción de que non só existen graves problemas estruturais e de definición do modelo sanitario, senón que tamén hai unha manifesta incapacidade ética e profesional por parte dos responsables sanitarios para xestionalo". "E isto", engaden, "ten un prezo que pagamos, en primeiro lugar, os pacientes en saúde e expectativas de curación e, en segundo lugar, os profesionais sanitarios en condicións laborais e en calidade asistencial".