Preparan unha lista alternativa a Gómez-Reino en Podemos Galicia por levar o partido "á desaparición"
O portavoz de Rexurdir Podemos Galicia, Gonzalo Busqué, sinalou que o grupo de militantes está formado por unhas 70 persoas de distintos puntos de Galicia que comezaron a traballar xuntos tras as eleccións autonómicas de 2020.
Por Europa Press / Redacción | SANTIAGO DE COMPOSTELA | 17/11/2022 | Actualizada ás 12:17
Un grupo de militantes de Podemos Galicia traballa unha candidatura para o proceso de primarias anunciado o pasado mércores polo actual secretario xeral, Antón Gómez-Reino, ao que acusan de levar a organización "á desaparición" e de estar máis preto do proxecto político da ministra Yolanda Díaz que da dirección do seu partido a nivel estatal.
Tras facerse pública a convocatoria das eleccións internas que terán lugar entre o 21 de novembro e o 15 de decembro, este grupo de inscritos agrupados baixo o nome de Rexurdir Podemos Galicia saíu ao paso das declaracións de Gómez-Reino, a quen afean que fale en nome da organización cando a súa situación é de "interinidade" ao expirar o seu mandato no mes de outubro, cando se cumpriron catro anos do proceso no que se impuxo á fundadora do partido Carolina Bescansa.
En declaracións a Europa Press este xoves, o portavoz de Rexurdir Podemos Galicia, Gonzalo Busqué, sinalou que o grupo de militantes está formado por unhas 70 persoas de distintos puntos de Galicia que comezaron a traballar xuntos tras as eleccións autonómicas de 2020 nas que a coalición Galicia En Común encabezada por Gómez-Reino non logrou representación.
Consideran que o deputado no Congreso --que ligara o seu futuro en Madrid ao resultado das eleccións galegas-- debeu dimitir entón do seu cargo polo "fracaso" nas urnas. Desde entón, segundo apunta Busqué, este grupo cre que o liderado de Gómez-Reino levou "á desaparición" a Podemos Galicia porque o seu máximo responsable "non está no día a día" da organización, o que levou a unha "desactivación" da militancia, como evidencia que "só existan 65 círculos activos" nunha comunidade onde hai "un 30% menos" de inscritos que na media do Estado.
"ENTREGADO" A SUMAR
Ante a apertura dun ciclo electoral que o propio Gómez-Reino evoca como "clave" e no que o foco está posto no nacemento do proxecto Sumar de Yolanda Díaz, esta plataforma crítica acusa ao secretario xeral de "ligar o futuro" de Podemos Galicia á súa integración na plataforma da ministra sen que exista un debate interno.
"Non dicimos que Yolanda Díaz non teña que encabezar o proxecto, pero hai que ver como se desenvolve", incidiu Busqué, quen, tras subliñar o "vínculo emocional moi forte" que teñen "desde hai anos" a ministra e Gómez-Reino, reivindica que Podemos ten unhas liñas políticas "identificadas" que deben quedar reflectidas na súa relación con Sumar.
Deste xeito, consideran que Gómez-Reino "ten ligado o seu futuro" ao proxecto da ministra, da que, din, está "moito máis preto" do que está da dirección de Podemos que encabeza Ione Belarra.
PARTIDO "DESATENDIDO"
Ademais das dúbidas sobre a relación co novo proxecto de Díaz, este grupo de militantes tamén é crítico coa forma de pilotar a organización desde 2018 por parte de Gómez-Reino, a quen acusan de evadirse do "día a día" do partido.
Así, acusaron ao secretario xeral de delegar estas tarefas noutras persoas, o que conduciu a Podemos Galicia "á desaparición".
Por todo iso, Gonzalo Busqué avanzou que Rexurdir Galicia traballa na configuración dunha candidatura alternativa ás primarias, que esperan que estea encabezada por unha persoa "de consenso".
