Novo sistema de cotización para autónomos, con cotas de 230 a 500 euros

O novo sistema de cotización de autónomos por ingresos reais, que contará cun período de transición de nove anos, ata 2032, comezará a aplicarse a partir deste 1 xaneiro, con 15 tramos de cotas que irán desde os 230 euros ata os 500 euros e variarán ata 2025, en función dos rendementos netos dos traballadores por conta propia.

Este sistema é froito do acordo entre o Goberno e as organizacións de autónomos ATA, UPTA e Uatae e conta con 15 tramos para os anos 2023, 2024 e 2025. Os autónomos terán a posibilidade de cambiar de tramo cada dous meses, cun total de seis cambios ao ano, para adaptar a súa cotización ás previsións de ingresos en cada época do ano e da súa actividade profesional.

O novo sistema define o concepto de rendementos netos, que se calcularán deducindo dos ingresos todos os gastos producidos no exercicio da actividade e necesarios para a obtención de ingresos do autónomo.

Sobre esa cantidade, aplicarase adicionalmente unha dedución por gastos xenéricos do 7 % (3 % para os autónomos societarios). O resultado será a cifra que determinará a base de cotización e a cota correspondente.

Ao final do exercicio fiscal e unha vez coñecidos os rendementos netos anuais, regularizaranse as cotizacións, devolvéndose ou reclamándose cotas no caso de que o tramo de rendementos netos definitivos estea por baixo ou por encima do indicado polas previsións durante o ano.

Co novo sistema de cotización, espérase que un de cada dous autónomos teña unha cota máis baixa que a actual, mentres que un 25 % cotizará máis e un 25 % cotizará menos.

COTAS E TRAMOS

En 2023, a cota para un autónomo con rendementos netos (ingresos menos gastos) iguais ou inferiores ao Salario Mínimo Interprofesional será de 230 euros. En 2024, reducirase a 225 e en 2025, pagará 200 euros.

Para aqueles con rendementos netos superiores 1.300 euros e inferiores ou iguais a 1.500 euros, e por encima de 1.500 euros e inferiores ou iguais a 1.700 euros, a cota manterase en 294 euros durante o tres anos.

Mentres que nos tramos de rendementos máis baixos a cota tamén decrece entre 2023 e 2025, a partir dos rendementos netos superiores a 1.700 euros a cota vaise incrementando ao longo deses tres anos.

Así, un autónomo que presente rendementos netos por encima dos 3.620 euros e ata 4.050 euros, ou igual a ese monto, (tramo 13) pagará 100 euros máis de cota entre 2023 e 2025. En 2023, comezará a pagar 390 euros, subirá a 400 euros en 2024 e a 490 en 2025.

No último tramo, o décimo quinto, atópanse todos os autónomos con rendementos netos superiores aos 6.000 euros. A súa cota para este 2023 será de 500 euros, elevarase a 530 euros ao ano seguinte e chegará a 590 euros en 2025.

Pasados ese tres anos, Goberno e axentes sociais terán que pactar os tramos para os próximos anos, ata 2032.

COTA REDUCIDA POR INICIO DE ACTIVIDADE

A tarifa plana do actual Réxime Especial de Traballadores Autónomos (RETA) intégrase tamén no novo modelo, aínda que pasará a chamarse cota reducida para os autónomos que inicien a súa actividade e será de 80 euros ao mes durante doce meses para todos os novos autónomos.

Pasado ese período, esa cota reducida só prorrogarase para os autónomos que non conseguisen que os seus rendementos despeguen e sigan por baixo do Salario Mínimo Interprofesional (SMI). Para o resto, aplicarase a cota correspondente ao seu tramo de cotización segundo os seus rendementos netos.

Este novo sistema de cotizacións tamén pretende mellorar as pensións dos traballadores por conta propia, que son actualmente un 43 % inferiores ás dos asalariados, así como garantir as súas prestacións sociais.

Esa diferenza entre as pensións de autónomos e asalariados, duns 600 euros ao mes, débese a que o 84 % dos afiliados ao RETA cotizan pola base mínima, duns 300 euros, o que repercute na súa pensión de xubilación.

Traballadores autónomos | Fonte: Arquivo