Por Europa Press / Redacción | PONTEVEDRA | 08/01/2023 | Actualizada ás 19:20
Médicos do Hospital Montecelo denunciaron este domingo a situación de saturación do Servizo de Urxencias do centro provocado, entre outros motivos, "pola falta de facultativos en PACs de diversos concellos" e de reforzo no propio servizo do centro hospitalario.
Nun documento asinado por eles mesmos que utilizaron para informar aos pacientes de Urxencias e que recolleu a Plataforma pola Defensa do Centro de Saúde de Seixo, os médicos indican que este domingo non hai persoal médico nas urxencias da PAC da Parda, O Grove, Caldas de Reis e Baltar, só persoal de enfermaría.
Isto provoca que se deriven aos pacientes ás Urxencias do Montecelo para ser valorados onde, tal e como detallan, non se dispuxeron reforzos médicos, "cousa que é habitual". "Polo que atendemos a un maior número de pacientes cos mesmos medios, o que leva unha demora na asistencia", advertían na nota.
"Pomos isto en coñecemento dos usuarios para que comprendan que a demora na asistencia ten unha causa, non é arbitraria, e que priorizándoa con criterios médicos aseguramos unha correcta asistencia sanitaria á poboación dada a precaria situación actual extrahospitalaria", conclúen os facultativos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.