A Deputación da Coruña reclama que a Xunta mellore o "deficiente sistema asistencial" en Atención Primaria
O organismo provincial informou da resolución do IV Premio Luísa Villata a proxectos pola igualdade, convocado pola Deputación da Coruña a través das áreas de Cultura e Igualdade.
Por E.P. | A CORUÑA | 27/01/2023 | Actualizada ás 17:25
A Deputación da Coruña aprobou, na sesión plenaria celebrada este venres, unha moción na que insta á Xunta a mellorar o "deficiente sistema asistencial" en Atención Primaria, ademais de expresar o seu apoio á mobilización cidadá convocada pola plataforma SOS Sanidade Pública en Santiago de Compostela o 12 de febreiro.
Así se recolle no texto da moción presentada polos grupos do PSdeG-PSOE e do BNG, e aprobada co voto favorable de todos os grupos excepto o PP, no que se expón "a preocupación da cidadanía ao comprobar como un elemento fundamental do seu benestar, como é o sistema sanitario, está a evidenciar debilidades xeradas por unha xestión errática e unha visible desatención".
Coa aprobación da moción, a Deputación da Coruña insta tamén á Xunta de Galicia "a mellorar o deficiente sistema asistencial na Atención Primaria, que nos últimos anos, desde o 2009, reduciu o seu orzamento en 140 millóns de euros e perdeu un milleiro de profesionais sanitarios".
Entre os asuntos levados á sesión plenaria, o pleno da Deputación da Coruña aprobou, neste caso por unanimidade, a primeira fase do Plan de Conservación de Vías Provinciais, que en 2023 estará dotado cun orzamento dun dez millóns de euros.
PREMIO
Nesta mesma xornada, o organismo provincial informou da resolución do IV Premio Luísa Villata a proxectos pola igualdade, convocado pola Deputación da Coruña a través das áreas de Cultura e Igualdade.
As propostas seleccionadas polo xurado, que recibirán axudas de entre 3.700 e 12.500 euros, van desde a divulgación feminista de memoria local á instalación de murais interactivos con información sobre referentes na música galega ou a montaxe de pezas de teatro comunitario para dar visibilidade e pór en valor o traballo das mulleres no ámbito rural, pasado por charlas divulgativas, de natureza didáctico-musical e carácter interactivo.
