A Xunta advirte que as medidas para controlar a inflación non poden prexudicar a agricultores e gandeiros
O conselleiro sostivo que non se poden promover baixadas nos prezos dos alimentos sen garantir o cumprimento da prohibición da venda a perdas recollida na Lei da cadea alimentaria en beneficio dos agricultores e gandeiros
Por E.P. | SANTIAGO DE COMPOSTELA | 03/05/2023 | Actualizada ás 16:06
O conselleiro do Medio Rural, José González, advertiu ao Goberno central que non pode controlar a inflación á conta dos agricultores e gandeiros. Así o trasladou este mércores durante a súa participación de forma telemática na Conferencia sectorial de agricultura e desenvolvemento rural, da que informou o seu departamento nun comunicado.
O conselleiro sostivo que non se poden promover baixadas nos prezos dos alimentos sen garantir o cumprimento da prohibición da venda a perdas recollida na Lei da cadea alimentaria en beneficio dos agricultores e gandeiros. No caso do vacún de carne, o titular de Medio Rural trasladou a preocupante situación do sector en Galicia, xa que os prezos en orixe non alcanzan un nivel suficiente para cubrir os custos de produción.
Na reunión, José González fixo mención á carta recentemente remitida polos conselleiros de Galicia, Asturias e Cantabria na que se solicitaban que España liderase na Unión Europea a demanda de flexibilización nos requirimentos ambientais da nova Política Agraria Común (PAC), así como unha prórroga no prazo de presentación das solicitudes deste ano 2023, dada as moitas novidades e dificultades no funcionamento das aplicacións informáticas.
Na misiva tamén se solicitaba unha moratoria na aplicación do caderno dixital das explotacións para a súa implantación definitiva no 2025. A maiores, o conselleiro referiuse a as últimas medidas aprobadas polo Goberno central, concretamente á revisión á baixa dos índices de rendemento neto aplicables no método de estimación obxectiva (módulos) do IRPF para actividades agrícolas e gandeiras no período impositivo de 2022.
Neste sentido, considerou que a rebaixa debería ir máis aló e non deixar fóra aos produtores que tributan en estimación directa, xa que --tan só no caso do sector do leite-- quedarían sen beneficios o 27% das explotacións galegas, que se sitúan por encima dos 250.000 euros de facturación anual. Respecto diso, lembrou a súa demanda de aplicar unha rebaixa, aínda que fose temporal, do IVE da carne, de forma que --á vez que o consumidor paga menos-- os gandeiros poidan cobrar un prezo máis alto polo seu produto.
