Máis de 1,3 millóns de desprazamentos no noroeste, incluída Galicia, pola ponte de agosto

A Dirección Xeral de Tráfico (DGT) porá en marcha desde este venres, 11 de agosto, ás 15.00 horas, unha nova operación especial con motivo da ponte do 15 de agosto, que se prolongará ata as 24 horas do próximo martes.

Durante este cinco días, Tráfico prevé que se produzan ao redor de 1.368.000 desprazamentos na zona noroeste, nas comunidades de Galicia, Asturias e Cantabria. Supoñen o 16 % de todos os movementos esperados a nivel estatal, que serán uns 8.550.000 tanto de longo como de curto percorrido por todas as estradas da xeografía nacional.

Ademais dos desprazamentos de saída e retorno polo cambio de quincena, a DGT engade que se unirán os que se realicen a poboacións do litoral e praias ou zonas de segunda residencia. Así mesmo, esta fin de semana vanse a celebrar festexos en numerosas poboacións do territorio nacional polo que prevé que se incrementen as viaxes de curta distancia para desprazarse aos mesmos, tanto pola rede principal de estradas, como pola secundaria, especialmente nas noites e as madrugadas destes días de Operación Especial.

No plan articulado pola DGT para esta ponte figuran 38 puntos conflitivos nas vías galegas, entre elas infraestruturas de relevancia como a AP-9, a A-6, a A-8, a A-55, a A-52, a AG-56, a N-550 e a N-120.

Por provincias, na da Coruña hai 17 puntos conflitivos por posibles retencións, entre eles seis na AP-9 (o acceso á cidade herculina, a peaxe de Cecebre, a de Teo en sentido Santiago e o acceso a Ferrol), a AG-11 entre Ribeira e Padrón, o acceso de Santiago desde Noia na AG-56, e a AG-55 entre A Coruña e a Costa da Morte.

En Lugo, hai cinco entre os cales a DGT inclúe o tramo da A-6 cortado pola reparación do viaduto do Castro. Por isto mesmo, Tráfico prevé retencións na N-6 nesa mesma zona en Pedrafita do Cebreiro, mentres que tamén avisa de posibles néboas na A-8, entre Mondoñedo e Abadín.

En Pontevedra, contabilízanse 13 puntos conflitivos, como retencións na A-52 no Porriño, na A-55 na entrada a Vigo e dúas na AP-9, concretamente a saída á Autovía do Salnés (AG-41) e na Ponte de Rande, neste caso por obras. A DGT tamén pon o foco na VG-4.1, entre Sanxenxo e A Lanzada, e na Autovía do Morrazo (AG-46).

Finalmente, na provincia de Ourense hai tres puntos conflitivos, entre eles a N-120 á altura da capital e en saídas cara á A-52, por retencións e tráfico intenso.

EXTREMAR AS MEDIDAS

Por todo iso, Tráfico insiste aos condutores en extremar as medidas de seguridade viaria e, moi especialmente, non conducir baixo os efectos do alcol e/ou as drogas polo que se intensificarán as medidas preventivas de control de velocidade, alcoholemia e drogas por parte dos axentes da Agrupación de Tráfico da Garda Civil.

En paralelo, despregarase unha campaña especial de vixilancia e control de alcol e drogas que, tanto os axentes da Agrupación de Tráfico da Garda Civil, como as Policías locais que se sumen á mesma, levarán a cabo desde este luns 14 de agosto, tanto en estradas como en núcleos urbanos, co obxectivo de concienciar sobre o risco que supón a suma do consumo de alcol e/ou drogas e a condución.

MEDIDAS ESPECIAIS

Para dar cobertura a esta operación e facer que todos os movementos previstos sexan seguros, Tráfico estableceu unha serie de medidas de regulación, ordenación e vixilancia do tráfico para as que conta con axentes da Agrupación de Tráfico da Garda Civil, persoal funcionario do oito Centros de Xestión de Tráfico e persoal encargado do mantemento de equipos e da instalación de medidas na estrada, ademais do persoal dos servizos de emerxencias.

Respecto dos medios materiais, a DGT conta con 780 radares fixos de control de velocidade, dos cales 92 son de tramo, 545 radares móbiles que poden ir embarcados nos vehículos da ATGC, 245 cámaras e 15 furgonetas camufladas para control do uso de móbil e cinto de seguridade. Do mesmo xeito, dispón de helicópteros e drones para a vixilancia desde o aire e de vehículos e motos sen rotular que circularán por todo tipo de vías.

EVITAR AS HORAS MÁIS CONFLITIVAS

As previsións de circulación elaboradas por Tráfico contemplan que o venres pola tarde, principalmente entre as 16.00 e as 23.00 horas, produciranse importantes movementos de vehículos que provocarán intensidades elevadas e problemas de circulación nas saídas das grandes cidades, así como nas principais vías de comunicación de acceso ás zonas turísticas do litoral, segunda residencia e poboacións en festas.

O sábado pola mañá (de 9.00 a 14.00 horas) continuará o tráfico intenso de saída en numerosas poboacións de toda a xeografía, mentres que o domingo, especialmente entre as 19.00 e as 22.00 horas, comezará o retorno dos que gozasen deste fin de semana estival. Como sinalou a DGT, o luns prevé que sexa o día máis tranquilo desta operación especial e o martes, de 18.00 a 23.00 horas, comezará a operación retorno.

Retencións na AP-9 nunha imaxe de arquivo | Fonte: EP