O alcalde de Pontevedra solicita entrevistas cos presidentes da Xunta e da Deputación
Nestas entrevistas pretende falar dos convenios pendentes ou en execución, investimentos e obras en marcha, ou que están á espera de poder acometerse e abordar tamén algunhas demandas do goberno pontevedrés.
Por Europa Press / Redacción | PONTEVEDRA | 16/08/2023 | Actualizada ás 18:20
O alcalde de Pontevedra, Miguel Anxo Fernández Lores, informou este mércores nunha comparecencia de prensa das cartas remitidas ao presidente da Xunta de Galicia, Alfonso Rueda, e ao novo titular da Deputación de Pontevedra, Luís López, nas que solicita unha entrevista con cada un.
Lores sinalou que co inicio dun novo mandato "é conveniente" ter unha entrevista con cada un dos presidentes, "se teñen a ben concedela", co obxectivo de "repasar os asuntos, que son moitos" e "que están en carteira". O alcalde de Pontevedra apuntou que no goberno local teñen "o máximo interese en manter unha relación de cordialidade institucional".
Segundo adiantou Fernández Lores, nestas entrevistas pretende falar dos convenios pendentes ou en execución, investimentos e obras en marcha, ou que están á espera de poder acometerse e abordar tamén algunhas demandas do goberno pontevedrés.
No caso da Deputación, tamén figuran asuntos como a cesión do Convento de Santa Clara ou as actuacións previstas no Museo de Pontevedra. "Son moitísimas cousas", comentou o alcalde, que tamén desexa "iniciar unha relación de face a estes próximos anos". "Estamos condenados a entendernos e a conseguir o máximo posible para os intereses dos cidadáns", concluíu.
En todo caso, o alcalde puntualizou que nas cartas que acaba de enviar non se especifican os temas a tratar nin se inclúe ningún dossier como tal, senón que unha vez concedida a entrevista xa se transmitirá esta información con detalle.
