O SERGAS nega que a licitación para concertar abortos en clínicas privadas incremente a derivación a estes centros
Apuntan ao Goberno central como un dos causantes desta licitación ante o atraso na creación dunha lista de obxectores.
Por Europa Press / Redacción | SANTIAGO DE COMPOSTELA | 30/08/2023 | Actualizada ás 20:06
O Servizo Galego de Saúde (Sergas) nega que a licitación dun contrato para concertar interrupcións voluntarias de embarazo en clínicas privadas vaia a supor incrementar as que se realizan nestes centros.
A Consellería de Sanidade indica nun comunicado de prensa que o Sergas realiza as interrupcións voluntarias do embarazo cos seus profesionais "en case un 70% dos casos". "A licitación, debe quedar claro, non altera a forma de prestar o servizo no Sergas", subliña.
Respecto diso, asegura que "seguirá prestándose maioritariamente na sanidade pública e, de forma ocasional, en centros privados que se rexerán a través dun contrato marco, tal e como esixe o Consello de Contas". Incide en que "de ningunha maneira esta licitación supón incrementar as IVES en clínicas privadas".
Neste contexto, xustifica que "a necesidade da licitación de interrupcións vén dada naqueles supostos de non ser posible facer no servizo público esta interrupción entre a semana 9 e 14, motivado, por exemplo, por decisión da propia muller ou por motivos de urxencia e non ter dispoñibles os quirófanos no prazo requirido".
"En todo caso, calquera muller que manifeste interese porrealizar a interrupción do embarazo na sanidade pública, así será", engade Sanidade. "De feito", segundo a consellería, na área de Vigo "o 100% das IVES fanse en rede do Sergas". "E traballamos para que así sexa en todas as áreas sanitarias", engade.
"EVITAR AS DEMORAS"
Coa contratación pública a centros autorizados, o departamento autonómico indica que "se trata de dar resposta e evitar as demoras na realización das intervencións, dado que se considera un procedemento sanitario de urxencia, debendo facilitar este tipo de servizos en tempo".
Actualmente, asegura, "ningunha muller ten que saír de Galicia para realizar unha IVE". Afirma así que a comunidade "está a cumprir a lei" a través dos seus profesionais sanitarios que están a prestar a asistencia sanitaria "debida" ás mulleres, con datos "moi por baixo" dos que constan en propia lei, cun 30% de derivacións.
"Na propia exposición da lei indícase que, no ano 2020, a derivación media en España estaba no 78%. En Galicia está, neste momento, no 30%, por tanto superando os obxectivos marcados", remarca.
Por outra banda, sinala que o rexistro de objetores está pendente de regularse polo Ministerio de Sanidade. Critica neste extremo á CIG e CC.OO., posto que, ao seu xuízo, "no canto de apuntar a Galicia erroneamente como responsable, deben dirixir as súas críticas ao Ministerio de Sanidade, polo atraso nesta importante regulación".
As xerencias das áreas sanitarias teñen coñecemento, puntualiza, dos profesionais que exercen o seu dereito de obxección de conciencia, "o que permite esa garantía de realización de intervencións en centros públicos no sete áreas sanitarias galegas".
Pola súa banda, os sanitarios do sistema galego de saúde non objetores "están a practicar con total normalidade as interrupcións de embarazo", defende, polo que "o 100% delas estanse facendo en Galicia sen necesidade de ter que ir fóra da comunidade".
"EXISTEN EN TODAS AS CC.AA."
A extensa nota de prensa de Sanidade argumenta que os centros concertados para a interrupción "existen en todas as comunidades autónomas, e Galicia o que fixo coa licitación é realizar a contratación pública de acordo coa lei de contratos, e non contratar caso a caso".
"As garantías ás mulleres nos servizos públicos de Galiciaestán cubertas e esta consellería respecta de forma sobresaliente os dereitos das mulleres", subliña, antes de reivindicar unha asistencia sanitaria "de óptima calidade, con dedicación dos seus profesionais sanitarios e con formación específica".
Nesta liña, reitera que "xa desde hai anos a maioría das interrupcións da comunidade levan a cabo nos centros da sanidade pública (centros de orientación familiar e hospitais públicos)".
Así mesmo, agrega que o Sergas "está a desenvolver plans organizativos para seguir incrementando o número de IVEs que se realizan na sanidade pública, polo que calquera outra interpretación é --incide-- radicalmente falsa".
Por último, di que o Sergas seguirá realizando IVEs "en todas as semanas de xestación e en todas as áreas sanitarias, tal como xa se está facendo actualmente, polo que tan só derivaranse aquelas interrupcións consideradas polos profesionais sanitarios (semana 9 a 14), e coa documentación acreditativa correspondente".
