Teresa Táboas ve necesaria "unha perspectiva social" para un debate sobre a ordenación territorial de Galicia
Así o manifestou a exconselleira na súa intervención na xornada 'Pensar o mundo desde Galicia', organizada polo Consello da Cultura Galega este xoves.
Por E.P. | SANTIAGO DE COMPOSTELA | 19/10/2023 | Actualizada ás 20:22
A arquitecta Teresa Táboas avogou por abrir "desde unha perspectiva social, cultural e ambiental" o debate da ordenación territorial de Galicia, onde "a pasta de papel alterou o monocultivo que cambiou a paisaxe e, con ela, as cores" cos que os galegos se recoñecen "como entidade".
Así o manifestou a exconselleira na súa intervención na xornada 'Pensar o mundo desde Galicia', organizada polo Consello da Cultura Galega este xoves e na que tamén participou o arqueólogo Agustín Azkárate, quen manifestou que "non se pode recuperar un espazo sen documentalo e comprendelo".
A arquitecta incidiu en que Galicia foi territorio "antes que lingua" e que os galegos están "tan vinculados" á terra que crearon a súa propia medida, o ferrado. Para Táboas, o territorio "son capas dun mesmo elemento sobre as que houbo moitas miradas ao longo dos séculos", polo que "cada un ten, desde nenos, unha identidade cromática da paisaxe".
Así, destacou como as cuestións económicas modifican a paisaxe, algo que, segundo a conselleira durante a etapa do bipartito, ocorreu coa explotación do eucalipto. "A pasta de papel alterou o monocultivo que mudou a paisaxe e con ela as cores coas que nos recoñecemos como entidade", sinalou.
