Por E.P. | SANTIAGO DE COMPOSTELA | 29/10/2023 | Actualizada ás 14:16
O secretario xeral do PSdeG, Valentín González Formoso, esixiu ao presidente da Xunta, Alfonso Rueda, que "deixe de enganar e someter" á cadea mar-industria aos "intereses electorais" do PPdeG coa lei galega do litoral.
Estas declaracións chegaron tras o acto celebrado na Cidade da Cultura, na xornada do sábado, no que o sector mar-industria esixiu ao Goberno que "reconsiderase" a súa decisión ante esta lei.
No acto, no que tamén participaron a vicepresidenta segunda e conselleira de Medio Ambiente, Territorio e Vivenda, Ángeles Vázquez, o conselleiro do Mar, Alfonso Villares, asinaron un manifesto.
Na xornada deste domingo, Formoso incidiu en que son os populares os que "provocan incertezas e inseguridade xurídica" tras aprobar "de forma unilateral" unha lei do litoral e "choca en 27 dos seus artigos" coa Constitución.
"Non se pode xogar con normas, nin se pode defender a Constitución pola mañá e incumprila pola tarde", engadiu. O socialista "ten claro" que a día de hoxe "ningunha empresa" do sector do mar-industria "corre perigo" pola normativa estatal, xa que "todas e cada unha das prórrogas" das concesións solicitadas "foron autorizadas" polo Goberno.
Por outra banda, considerou que isto é "parte da estratexia electoral" do PPdeG cara ás autonómicas e emprazou a Rueda a "volver á vía do diálogo nun asunto de país" e lembroulle que "se o que quere facer é campaña, que convoque xa eleccións".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.