O Álbum de Galicia recolle a biografía do investigador Xoán González-Millán
"O seu compromiso coa difusión da cultura galega nos ámbitos académicos internacionais foi incansable", subliñan Dores Vilavedra e Alejandro Alonso Nogueira,
Por Europa Press / Redacción | SANTIAGO DE COMPOSTELA | 22/11/2023 | Actualizada ás 16:43
O Álbum de Galicia incorporou a biografía do docente e investigador Xoán González Millán, responsable da renovación dos estudos literarios galegos no postfranquismo e cuxa traxectoria profesional se desenvolveu, fundamentalmente, na cidade de Nova York, desde onde articulou a Galicia da diáspora.
"O seu compromiso coa difusión da cultura galega nos ámbitos académicos internacionais foi incansable", subliñan Dores Vilavedra e Alejandro Alonso Nogueira, responsables da súa entrada na colección de biografías que ampara o Consello da Cultura Galega (CCG).
Nacido no Grove, Juan Francisco González-Millán, que reivindicou máis tarde o nome de Xoán ou Xan entre as persoas máis achegadas, licenciouse en Filosofía e Letras na Universidade Pontificia Comiñas de Madrid en 1976. Nese ano, trasladouse aos Estados Unidos, onde cursou o doutoramento no Graduate Center baixo a dirección de Thomas Mermall e cun traballo titulado Proceso textual e desintegración narrativa na novelística de Álvaro Cunqueiro.
En 1990 integrouse como docente do Program in Hispanic and Luso-Brazilian Literatures and Languages e, ao ano seguinte, tras escoller a Real Academia Galega a Álvaro Cunqueiro como figura protagonista do Día dás Letras Galegas, escribiu dous manuais sobre o escritor.
Posteriormente, González-Millán centrou o seu campo de estudo na narrativa galega contemporánea e, en concreto, en cuestións vinculadas "á suposta condición periférica da literatura galega", explican os autores da súa biografía. Nela, chaman a atención sobre como Xoán González-Millán renovou os estudos galegos no posfranquismo, ata ese momento "moi ancorados nos modelos historicistas", a través da procura dunha "nova episteme desde a que ofrecer hipóteses interpretativas de carácter totalizador".
Desde a segunda metade dos anos noventa, os intereses de González-Millán derivaron cara á "análise da tensión dialéctica entre a cuestión nacional(ista), a articulación institucional da literatura e a dificultosa colocación desta na esfera pública galega", apuntan Vilavedra e Alonso Nogueira.
