A Valedora do Pobo advirte á Xunta: Non debe negar cobertura sanitaria a inmigrantes en situación irregular
En resposta á unha queixa previa presentada por Cáritas.
Por Europa Press / Redacción | SANTIAGO DE COMPOSTELA | 10/01/2024 | Actualizada ás 17:40
A Valedora do Pobo advertiu á Consellería de Sanidade que non debe negar a cobertura sanitaria ás persoas inmigrantes que se atopan en situación administrativa irregular por carecer de permiso de residencia. Así o recolle unha resolución, á que tivo acceso Europa Press, emitida tras unha denuncia realizada por Cáritas de Mondoñedo-Ferrol, que recorreu á institución que dirixe María Dores Fernández Galiño ante a "sistemática negativa" de Sanidade de conceder o cartón sanitario a menores estranxeiros en situación irregular.
A Xunta, como trasladou á Valedora na argumentación recollida no expediente, interpreta que as persoas que se atopan en territorio español durante un período menor a 90 días teñen a consideración administrativa de "estancia" e non de "residencia", co que non teñen dereito a cartón sanitario.
Na súa resolución, o Alto Comisionado do Parlamento galego determina que aínda que a lei non establece un dereito de acceso gratuíto ao Sistema Nacional de Saúde para todo estranxeiro que se atope "temporalmente" en España, no caso das persoas migrantes e, en especial, dos menores, as administracións deben velar por que conten con protección sanitaria gratuíta.
Incide en que se trata de grupos poboacións "vulnerables" que teñen que facer fronte a "dificultades non só económicas, senón sociais e administrativas" e subliña que a propia lei á que fai referencia a Xunta "ten en conta a posibilidade de que unha persoa formalmente en situación de estancia temporal sexa merecedora, con todo, da protección da saúde por parte do Estado". Todo isto para, continúa a valedora, a "salvagarda" da "dignidade humana" destas persoas se carecen dos medios para atender "as súas necesidades máis basicas e perentorias de saúde, podendo demostrar, ademais, a súa vontade de permanecer en país dunha maneira máis estable".
Nesta liña, conclúe que a situación exposta por Cáritas na súa queixa "non compromete" ao sistema sanitario nin supón que "se faga un mal uso" do mesmo, senón que se trata de "unha posible negación de asistencia sanitaria a persoas en situación vulnerable, especialmente mulleres e nenos" que non poden acreditar que se atopan en España desde hai máis de 90 días e que, por este motivo, négaselles desde da administración a cobertura sanitaria a pesar de que carecen de recursos para facer fronte aos gastos que carrexan "procesos de embarazos e outros".
CÁRITAS PIDE QUE SE CORRIXA
Nun comunicado, Cáritas valorou a resolución da Valedora do Pobo, que ven como "un gran paso para instar as administracións e, neste caso á Xunta, a actuar como garante dos dereitos de todas as persoas". A organización eclesiástica da diocese de Mondoñedo-Ferrol atende ao ano a máis de 4.000 personas das que o 45% son persoas migrantes, das que un de cada catro son menores de idade.
