Por Europa Press / Redacción | SANTIAGO DE COMPOSTELA | 15/01/2024 | Actualizada ás 16:53
A Xunta de Galicia abriu o prazo para presentar as solicitudes para as axudas para o pago do aluguer, tal e como recolle a resolución publicada no Diario Oficial de Galicia (DOG) a pasada semana.
A convocatoria, que está dotada cun total de 20 millóns de euros para os anos 2024 e 2025, establece que as axudas que poden conseguir o 60 por cento do importe do aluguer no caso de que as persoas beneficiarias pertenzan a uns determinados colectivos. En concreto menores de 36 anos, familias numerosas e monoparentais, emigrantes retornados a Galicia recentemente e cunha estancia mínima de dous anos fóra de España e persoas inscritas desde fai máis dun ano no Rexistro único de demandantes de vivenda protexida.
No resto dos casos a axuda será 50, 40 ou 30 por cento do custo do aluguer en función dos ingresos dos beneficiarios para "garantir un funcionamento máis xusto e distributivo do programa", sinala a Xunta.
Neste sentido e con carácter xeral, os ingresos da unidade de convivencia non poderán superar 3 veces o Iprem e canto máis baixos sexan maior será a porcentaxe da renda subvencionada. En todo caso, o tope elevarase ata 4 ou 5 veces o Iprem no caso de familias numerosas ou que teñan algún membro cunha discapacidade.
A nova convocatoria limita tamén o prezo do arrendamento das vivendas para as que se solicita a axuda en función do concello no que estean localizadas. En concreto, no caso das 7 cidades, onde os prezos son máis altos, a renda máxima queda fixada en 600 euros; nos concellos da zona 1, que agrupa as vilas e os municipios de carácter urbano, o límite será de 550 euros; e no resto de Galicia o arrendamento non superará os 425 euros.
As solicitudes das axudas presentaranse preferentemente por vía electrónica a través do formulario normalizado dispoñible na sede electrónica da Xunta de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.