Sindicatos alertan de que cinco dos principais contratos de ambulancias do 061 "poden quedar desertos"

Os sindicatos CIG, UXT, CCOO e USO mostran a súa "preocupación" ante a posibilidade de que cinco dos principais contratos do 061, que atenden a algunhas das zonas máis poboadas, "poden quedar desertos" pola falta de dotación económica suficiente para cubrir custos.

Nun comunicado, explican que o pasado venres finalizou o prazo para presentar as ofertas aos novos concursos do transporte sanitario urxente (061), pero catro das actuais xestoras non concorreron: Ambulancias de Pontevedra (que cobre as áreas de Pontevedra e O Salnés), Ambulancias do Atlántico (que dá servizo a Vigo), Ambuibérica (que atende o Baixo Miño) e SASU (que opera na Coruña).

"Que as actuais empresas adxudicatarias non presenten ofertas é un feito inusual no funcionamento deste sector e evidencia algo que as organizacións sindicais levan anos denunciando, que os contratos están economicamente infradotados", expoñen. Unha cuestión que supón un risco de que os contratos poden quedar desertos.

Denuncian que a Xunta aposte por un transporte sanitario "precarizado e unha prestación deficiente deste servizo público básico", "a pesar das reiteradas queixas trasladadas nestes últimos anos tanto por parte do persoal como polas propias persoas usuarias". "Resulta obvio que plan tan magnífico anunciado polo Goberno galego para o transporte sanitario non é certo, pois non hai ningunha mellora no servizo de ambulancias", apostila.

Doutra banda, as centrais sindicais denuncian que a Xunta segue sen publicar os novos contratos do transporte non urxente, a pesar de que se comprometeu co sector a sacalos entre os meses de setembro e outubro. Con todo, ás portas de febreiro, "nada se sabe das licitacións". Isto provoca "inquietude" entre os traballadores, xa que unha parte do incremento económico pactado no convenio colectivo aplicarase a partir da entrada en vigor das novas adxudicacións. Por todo iso, os sindicatos non descartan iniciar mobilizacións "se nos próximos días seguen sen darse solucións concretas a estes problemas".

Protesta de traballadores do sector de ambulancias, en Santiago | Fonte: Europa Press